Bul baǵdarlama halyqtyń ónimdi ispen aınalysyp, tabysyn arttyrýǵa jaǵdaı týǵyzý maqsatynda júzege asyryla bastaǵan-dy. Atalmysh baǵdarlama baǵyttarynyń biri – mıkro jáne shaǵyn bızneske nesıe berý. Osy maqsatta isin jańa bastaǵan jáne bıznesi bar kásipkerlerdi, jumyssyzdar men kásipkerlikke beıimi bar ózin-ózi jumyspen qamtýshylardy qarjylandyrý kózdelgen.
Baǵdarlamanyń jańa redaksııasynda isin jańa bastaǵan jáne bıznesi bar kásipkerler jınaıtyn qujattar qataryna ózgeris endi. Buǵan deıin nesıe nemese mıkronesıe alý úshin isin jańa bastaǵan kásipker «Eńbek naryǵy» avtomattandyrylǵan aqparattyq júıesiniń tekserýinen ótip, Halyqty jumyspen qamtý ortalyǵynan joldama alyp, ol qujatty bıznes-josparymen birge ótkizý kerek edi. Jańa ózgerister boıynsha, bıznesi bar kásipkerler úshin bul joldamanyń qajeti joq. Al isin jańa bastaǵan kásipkerler úshin qujatty kútý merzimi naqtylanyp, 2 jumys kúnin qurady.
Baǵdarlama talaptary boıynsha buǵan deıin bul joldamanyń daıyn bolý merzimi belgisiz bolyp, óz isin ashpaq bolǵan jandar qarjyny uzaq kútetin.
Turǵyn-jaı alýǵa, salýǵa jáne jer telimderin satyp alýǵa mıkronesıe berýge tyıym salatyn talap ta ózgerdi. Endi baǵdarlamaǵa engen túzetýdiń arqasynda kásipkerler nesıe qarajatyna turǵyn-jaı satyp alyp, 12 aı ishinde maqsatyna sáıkes qaıta resimdeı alady.
Sondaı-aq baǵdarlamaǵa buǵan deıin usaq bıznes ashqan nemese ony keńeıtýge mıkronesıe alǵan kásipkerlerge qatysty qosymsha talaptar da engizildi. Endi kásipkerler jergilikti atqarýshy organdar qarajatynan jol, káriz júıeleri, jylý, sý, gazben qamtamasyz etý, telefon jáne elektr jelileri sekildi ınfraqurylym júıelerin júrgize alady. Munymen qatar ekinshi deńgeıli bankter men mıkroqarjy uıymdaryna salynǵan qarajatty ıgerý merzimi de 12 aıdan 6 aıǵa deıin qysqardy.
Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasyna 2018 jyly 10 mlrd teńge jumsalady dep josparlanyp otyr. Baǵdarlamaǵa jumyssyzdar, ózin-ózi asyraýshylarmen qatar isin jańa bastaǵan jáne bıznesi bar kásipkerler de qatysa alady. Bir adamǵa 8000 AEK kóleminde qarjy jylyna 6 paıyzdan aspaıtyn mólsherlememen beriledi. Sondaı-aq kepilzaty jetpegen kásipkerler baǵdarlama aıasynda «Damý» qorynyń kepildemesin de ala alady. Ol boıynsha startaptarǵa nesıe somasynyń 85 paıyzyna deıin, basqa jobalarǵa 50 paıyzǵa deıin kepildik beriledi.
Qazirgi kezde jalpy somasy 6,6 mlrd teńge nesıe alǵan kásipkerler sany 593-ke jetti.
Aınash ESALI,
«Egemen Qazaqstan»
ALMATY
