Kúıeýi qaıtys bolyp, shıtteı 7 balamen qalǵan jesir áıel qaıtedi? Qaı jerde tabys kózi moldaý, qaı jerde tirshilik etý ońaı, endi ne isteımin degen san saýal aldynan shyqqanda Qyrǵyzstan azamaty Raısa Leskovskaıa Qazaqstanda jaǵdaı jaqsy degendi estip, shekara asady. Sóıtip júrgende qujatyn joǵaltyp, eline qaıta almaı qalady. 22 jyl boıyna qujatsyz tirlik etken Raısa apaıdyń jadynan balalary bir sátke shyqqan emes. Almaty oblysynyń «Sýyqsaı» aýylyn panalaǵan onyń janyna batqan muńyn «Barmysyń baýyrym» baǵdarlamasyna da aýyldasy jazypty. Raısa apaıǵa: «qujatyńyzdy jasaý úshin Astanaǵa barýyńyz kerek», deıdi jýrnalıster. «Qazaqstan» ortalyq konsert zalyndaǵy «Myń alǵys» qaıyrymdylyq keshinde sahna tórine shyǵaryp, «sizge aıtar jaqsy jańalyǵymyz bar, Bishkekten balańyz ben inińizdiń áıeli kelip tur», degende, baıǵus ana selk ete qaldy. Sol sáttegi ana júreginiń dir etýimen zalda otyrǵan sandaǵan kórermen kózine móltildep jas tirelgen. 22 jyl boıyna ańsarly ananyń qam kóńilinde, pás keýdesinde tolǵan zapyran sahna tórinde de, zal ishinde de jas bolyp tógildi.
Kireýkelengen janardaǵy muń tumany seıildi, jarq etken jasyn qýanysh Qyrǵyzstannyń Qazaqstandaǵy elshiliginiń konsýly Almazbek Kýanyshbekuly Raısa Leskovskaıaǵa jeke basyn rastaıtyn anyqtamany tabys etkende jurtshylyq sheksiz rıza boldy.
Qyzylordalyq Nazerke Qadirova da «Jan jylýy» baǵdarlamasynyń alǵashqy keıipkerleriniń biri bolypty. Jary ekeýi qaıtsek jyrtyǵymyzdy jamaımyz dep 7 bala jáne múgedek aǵasymen 1 bólmeli páterdi panalap kelipti. Jáne eresek múgedekke qosa 4 birdeı balasynyń da densaýlyǵy nashar. Basyńa tartsań aıaǵyńa jetpeıtin, kúrmeýge kelmes qysqa jipteı osy ómir baǵdarlamadan keıin ózgerdi. Nazerkeniń jaı-kúıin estigen qyzylordalyq kásipker, qurylys kompanııasynyń basshysy Temirhan Álimqulov kóp balaly otbasyna úsh bólmeli páterdi syıǵa tartqan.
Jurt jappaı qalaǵa kóship, osynyń saldarynan oqýshy azaıǵandyqtan kóp aýylda mektep jabylǵany belgili. Mektep jabylǵan soń talaı eldi mekenniń toz-tozy shyqqanyn da bilemiz. Aqmola oblysy Qoshqarbaı aýyly osy turǵyda kópshilikke úlgi eter eldi mekenniń biri der edik. Nege deısiz be? Olar qaıyrymdy isti qolǵa alyp, osynyń arqasynda bir emes birneshe áleýmettik máseleniń sheshim tabýyna muryndyq bolyp otyr. Bárine bastamashy bolǵan Qaıyrken esimdi azamat «Balalar úıinen bala asyrap alsaq qaıtedi?» dep usynys jasaıdy ol aýyldastaryna. Birinshiden, qamkóńil balalar jan jylýyn tapsa, ekinshiden, aýyldaǵy bala sany molaıar edi. Aýyldastary onyń bul oıyn quptaıdy. Osylaısha qoshqarbaılyq 6 otbasy 11 balany baýyryna salady. Aıtpaqshy alǵashynda 10 bala edi. Biraq bir úıge bala bolǵan aǵaly-qaryndasty balalar basqa bir balalar úıinde kishkentaı qaryndasynyń da tárbıelenip jatqanyn aıtqan. Artynsha baýyrlardy bir-birinen aıyrmaýdy oılaǵan ata-ana qyz balany da alyp keledi.
Dúrdana qyz ánshi eken. Syńǵyrlaǵan daýysy qandaı úndi, qandaı áýezdi edi?! Sahnadan Gúlnur Orazymbetovamen birge án shyrqap turǵan Dúrdana Habıbollanyń kózinde kózildirigi bar. Kózildirik Dúrdanany buǵan deıingi tas qarańǵy álemmen qoshtastyrdy. Bul onyń armanynyń oryndalǵan sáti.
Eger «Jan jylýy» baǵdarlamasynan Dúrdananyń basyndaǵy qıynshylyq aıtylyp, zaǵıp qyzdyń janaryna operasııa jasaýǵa qajetti 2 mıllıon teńge qarjy jıylmaǵanda Dúrdana bulaı án sala almas edi. Týǵannan qos janary janbaı, mańaıyndaǵy dúnıeniń túr-túsinen habarsyz Dúrdana 14 jasyna deıin «Anamnyń júzin bir kórsem dep armandaımyn. Maǵan jaýyndy kúngi aınala óte áserli sııaqty kórinedi. Aspandaǵy bulttarǵa qaraǵan keremet tárizdi», dep aınalasyn kózimen emes, qııalymen ǵana baǵamdaıtyn. «Operasııadan keıin kózáınek arqyly anamnyń júzin kórgendegi qýanyshymdy sózben aıtyp jetkize almaımyn, búginde oryndalmaıdy-aý degen armandarym júzege asýda. Dárigerler kórýiń budan da jaqsarady deıdi. Anamnyń júzin kórdim.Úlken sahnada endi mine, Gúlnur ápkemen birge án saldym, baqyttymyn», deıdi.
Keshtiń negizgi maqsatynyń biri týǵannan zaǵıp 1 jastan endi asqan Arman atty baldyrǵanǵa Reseıde operasııa jasaýǵa qajetti 2 mıllıon teńge jınaý bolatyn. Zalda otyrǵan Polatbek Jolanov atty azamat Armannyń baryp keletin jol aqysyn kóteretin bolyp shyqsa, Qaırat Joldybaıuly men Erbol Daırash kishkentaı sábıdiń emine qajetti qarajatty túgeldeı kóteretinin jetkizgende zal dúr ete tústi. Baldyrǵannyń bir kózine operasııa jasaýǵa 2 mln teńge kerek eken.
Pende árkez toıymsyz. Bary azdaı, jetistigi jetimsizdeı, tabysy tolymsyzdaı kórinip jatatyny bar. Al keshegi kúni konsertten shyqqan ár pende Jaratqannan keshirim surap, sabyrsyzdyqtan, toıymsyzdyqtan jasaǵan qatelikterim bolsa keshe gór, artyq aıtqan sózim bolsa, orynsyz jasaǵan isim bolsa kesh, 12 múshem saý bolyp, jaryq kúndi, myna álemdegi barlyq rızyqty aıamaı berip, aqy suramaǵan keńshiligińe shúkir, táýbá dep tarasqandaı.
Anar TО́LEÝHANQYZY,
«Egemen Qazaqstan»
