...oı qozǵaıdy
Atyn ózgerttik, zatyn qaıtemiz?
Qazaq baspasóziniń qara shańyraǵy – «Egemen Qazaqstan» gazetinde «Qazaqstan» (ázirshe osylaı jazaıyq, sebebi bizdiń qoldanystaǵy kompıýterde latyn tańbasy joq) korporasııasyna qarasty arnalardyń ataýlary ózgergeni týraly habar shyqty.
Álqıssa, atyn ózgerttik, endi zatyn qaıtemiz? Sebebi telearnalardyń qaısysyn ashpaıyq, kóretinimiz jyldap bitpeıtin serıaldar, atys-shabys, ólim-jitim, tabıǵı apat, qulaǵan ushaq, bir sózben aıtqanda – jan shoshyrlyq kórinister. Qazir elimizdiń jasóspirimderi arasynda neshe túrli qylmys órship tursa, onyń belgili bir mólsherlik paıyzynyń ósýine elimizdiń telearnalarynyń da úles qosyp otyrǵanyna eshqandaı kúmán joq. Ol jóninde belgili qoǵam qaıratkeri, jazýshy Qalı Sársenbaı da ashyna aıtqan eken.
«Aıta aıta Altaıdy, ánshi apaı qartaıdy» degendeı, bul aıtylmaı júrgen másele emes. Eger Elbasymyzdyń baǵdarlamalyq maqalasynda aıtylǵan rýhanı kemeldilikke qol jetkizý kerek desek, onda barlyq telearnalarymyz da baǵyt-baǵdaryn túbegeıli ózgertý kerek.
Zakarııa SISENǴALI,
Qazaqstan Jýrnalıster odaǵynyń múshesi
Batys Qazaqstan oblysy,
Jańaqala aýdany
...maqtan tutady
Shalqar – shattyq mekenim
Shuǵylaly atymen tanymal Aqtóbe oblysyndaǵy úlken aýdandardyń biri – Shalqar keń jazyq, buırat qum, móldir kólimen erekshe. Babalarymyz ańsap ótken egemendikke qol jetkizgen ýaqyt ishinde Shalqar aýdany da órkendedi, ózgerdi. Beıneý-Jezqazǵan temir joly halqymyzdyń áleýmettik jaǵdaıynyń odan ári kóterilýine, jańa beketterdiń salyna bastaýyna ıgiligin tıgizip jatyr. Temirjolshy mamandyǵyn alǵan jastarymyzdyń jańa beketterge úlken maqsatpen jumysqa ornalasýy – halyqtyń qýanyshy. Sonymen birge halyqqa qyzmet kórsetetin jańa úlgidegi emhana, aýrýhana, mektepter, qosymsha bilim berý mekemeleri, meıramhanalar, saýda, basqa da qyzmet kórsetý ortalyqtary ár aýylda jáne qala ortalyǵynda jyl saıyn boı kóterip keledi. Aýyldyń ajary tórt túlik mal, jaıqalǵan egis bolsa, bul kásipti de kásipkerlerimiz yńǵaıyn keltirip sharýasyn shalqytyp otyr.
О́z elin, óz tilin, óz tarıhyn tereń biletin bilimdi de, bilikti jastarymyzdyń álemdi aralap óz múmkinshilikterin kórsetip jan-jaqty abyroıly qyzmet etip júrgeni ár mekteptiń jetistigi, ár ustazdyń maqtanyshy. Shalqar qalasyndaǵy №6 orta mektep-ınternaty – bilim aıdynynda óz sara jolyn qalyptastyrǵanyna 30 jyl ǵana ýaqyt ótken mektep bolsa da maqtan eter shákirtterimiz jetken jetistikter kóp. Bilimge qushtar, ónerge beıim, eńbekke adal, sportqa sheber jas urpaq Shalqar atyn aımaqqa aıǵaq, respýblıkaǵa belgili, álemge áıgili etedi.
Sholpan MUQANOVA
Aqtóbe oblysy
...áserimen bólisedi
Jádigerler jigerlendirdi
Elbasy N.Á.Nazarbaevtyń «Bolashaqqa baǵdar: rýhanı jańǵyrý» maqalasyn júzege asyrý aıasynda jáne ishki ister organdary qyzmetkerleriniń rýhanı adamgershiligin, mádenı tárbıesin, patrıottyq sezimin arttyrý maqsatynda Jambyl oblysy Ishki ister departamenti basshylyǵynyń bastamasymen atalmysh mekeme qyzmetkerleri oblystyq tarıhı-ólketaný murajaıyna eki aptalyq ekskýrsııaǵa bardy.
Otyz myńnan astam eksponatpen jabdyqtalǵan oblystyq murajaı – rýhanı qundylyqtarymyzdyń birden bir saqtaýshy qory ekeni belgili. Sonaý saq dáýirinen bastap búgingi zamanǵa deıingi tarıh tereńinen syr shertetin jádigerlerdiń murajaıda saqtalýy baba murasyna adaldyǵymyzdy dáleldeıtindeı. El tynyshtyǵy men jarqyn bolashaqtyń jolynda qurban bolǵan batyrlarymyzdyń estelik jazbalary men erligi úshin ıelengen marapattary da osy jerde kózdiń qarashyǵyndaı qorǵaýǵa alynǵan. Sonyń biri – 2012 jyldyń qaraly qarashasynda qandyqol terrorısti keýdesimen jaýyp, erlikpen qaza tapqan Halyq Qaharmany Ǵazız Baıtasovtyń estelik zattary.
Elbasynyń baǵdarlamalyq maqalasy aıasynda uıymdastyrylǵan ekskýrsııaǵa oblystyq ishki ister organdarynan 1000-ǵa jýyq qyzmetker qatysyp, tarıhı jádigerlermen tanysyp qaıtty. Qatal tártip pen erejege baǵynǵan polısııa qyzmetkerlerin bir sát rýhanı ortamen de tanysýǵa múmkindik bergen departament basshylyǵynyń bul ıgi bastamasy barshaǵa úlgi bolarlyq is.
Botakóz BAQDÁÝLETQYZY,
Jambyl oblysy IID baspasóz qyzmetkeri
...pikirin joldaıdy
«Balapan» byldyrlasyn, mińgirlemesinshi!..
Tańerteń «Balapan» telearnasyn qarap otyrǵan ulym: «Áke, myna qyz ne aıtyp jatyr? Sózin túsinbedim. Aıtyp berińizshi» – dep janalqymnan aldy. Qarasam, «Alǵyr altaý» degen baǵdarlamany kórsetip jatyr eken. Kadr syrtyndaǵy mátin. Ulymnyń aıtqany ras eken, álgi qyzdyń (ne jýrnalıst, ne dıktor bolýy múmkin) sózin túsiný múmkin emes. Ár sózin murynǵa súıep, mińgir-mińgir etedi. Shaı iship otyr edim aýzymdaǵy asty juta almaı qaldym.
«Balam, sen de qaı-qaıdaǵyny suraıdy ekensiń» – dedim ana murynǵa tyǵylyp shyqqan daýystan túk túsinbeı. Kadr syrtyndaǵy mátin az emes, qoıdyń ishegindeı uzaq sóılem. Sony basynan aıaǵyna sheıin murynmen mińgirlep otyr, mińgirlep otyr. Estigen myńdaǵan balapan qulaqty emes, oqyp otyrǵan tilshige janym ashydy. «Tumaý tıip qalǵan sııaqty ǵoı» – dedi joldasym. «Tumaýyn bilmeımin, shaıyń shaı bolmady» – dep ornymnan turyp kettim.
Qý shóppen aýyz súrtýge bolmas, «Balapandy» kórip, balalarymyzdyń tiliniń túzelgeni ras. Biraq sondaı tátti arnanyń «mińgirin» estigim kelmegen edi. Basqa-basqa, «Balapan», sen byldyrlashy, mińgirlegenińdi estimeı-aq qoıaıyq!..
Jaras KEMELJAN,
jýrnalıst
Almaty
...jaqsylyǵyn jetkizedi
Jańa meshitke el rıza
О́tken jyldyń aıaǵyna taman Aqmola oblysynyń Arshaly kentinde paıdalanýǵa berilgen jańa meshitke bul kúnderi el rıza. Isi musylmandar úshin qasıetti meıram kúnderi syı retinde tartý etilgen «Nuraly bı» meshiti 250 adamǵa arnalǵan. Saltanatty sharaǵa aýdan əkimi, Nuraly bıdiń urpaqtary men aýdan turǵyndary qatysty. Shara barysynda ulttyq sport oıyndary men túrli mədenı sharalar uıymdastyryldy.
Meshit qurylysyna joba boıynsha 50 mıllıon teńgeden astam qarjy jumsalǵan jáne aýdan turǵyndary men demeýshilerdiń qarajatyna salynǵan. Aldaǵy ýaqytta meshit qasynan 200 oryndyq medrese ashý josparda bar.
Aslan OSPANOV
Aqmola oblysy
