Bul áleýmettik joba Ishki ister mınıstrliginiń bastamasy boıynsha «Baqytty balalyq shaqty qorǵaý» jylynyń sheńberinde uıymdastyrylǵan bolatyn. Sharanyń basty maqsaty – qaýipsiz balalyqty qamtamasyz etý, qoǵamda jasóspirimderge qatysty zańsyz áreketterge jol bermeý qaǵıdasyn qalyptastyrý.
«Bala – bizdiń baılyǵymyz. Sondyqtan olardyń ómiri árqashan baqytty ári qaýipsiz bolýy kerek. Osy maqsatta Ishki ister mınıstrligi naqty jáne mańyzdy sharalar qabyldaýda. Oǵan aıqyn dálel – biz 2018 jyldy «Baqytty balalyq shaqty qorǵaý» jyly dep jarııaladyq. Osy ataýly jyl aıasynda biz elimizdiń barlyq balalary úshin «Dınamo» qoǵamynyń sport seksııalaryn tegin ótkizetin bolamyz. Sol arqyly deni saý, básekege qabiletti urpaq daıyndaýǵa úles qosatyn bolamyz. Osy oraıda men atalǵan sharany qoldaýǵa kelgen barlyq qatysýshylarǵa alǵys aıtamyn», – dedi Ishki ister mınıstri aıtýly sharanyń ashylý saltanatynda.
Budan soń 2016 jylǵy olımpıada chempıony Dosjan Kartıkov sóz alyp, Qazaqstannyń barsha balalaryn sportpen aınalysýǵa shaqyryp, olımpıada shyńyn baǵyndyrýǵa tilektestigin bildirdi.
Aıta keter jaıt, «Dınamo» – Ishki ister mınıstrliginiń quramyndaǵy irgeli sport qoǵamy. Qazaq eliniń talaı maıtalman sportshylaryn tárbıelep shyǵarǵan basty uıym. Táýelsizdik jyldarynda dınamolyq sportshylar barlyǵy 56 olımpıadalyq medaldi el qorjynyna salyp, elimizdiń abyroıyn álemdik deńgeıde asqaqtatty. Osy júldelerdiń 11-i altyn, 18-i kúmis jáne 27-si qola medaldar bolatyn.
Is-shara barysynda balalar sport seksııalarynyń tárbıelenýshileri, Ulttyq ulannyń karabınshiler vzvody, sırk ónerpazdary, qyzmettik ıtter óner kórsetti, sondaı-aq olımpıada jeńimpazdarynyń qatysýymen oıyn-vıktorınalar uıymdastyryldy.
