ARMENPRESS
Armenııada jańa prezıdent saılandy
Armenııanyń tórtinshi prezıdenti bolyp Armen Sargsıan saılandy. Daýys berýdiń nátıjesin sanaq komıssııasynyń tóraǵasy Gagık Melıkıan plenarlyq otyrysta jarııalady.
Saılaýda Sargsıanǵa 90 depýtat qoldaý bildirip, 10 depýtat qarsy daýys bergen. Bir bıýlleten jaramsyz dep tanylǵan. Jańa prezıdenttiń kandıdatýrasyn tórt parlamenttik fraksııanyń úsheýi qoldaǵan, olar - «Respýblıkalyq partııa», «Armıan revolıýsııalyq federasııasy» jáne «Dashnaksýtıýn» blogy. Al «Elk» fraksııasynyń depýtattary qarsy bolǵan.
«Daýys berýge 101 depýtat qatysty. Jáshikte 101 bıýlleten boldy, sonyń bireýi jaramsyz dep tanyldy. Osylaısha, Armen Sargsıan respýblıka prezıdenti bolyp saılandy», - deıdi Ulttyq jınalysta Ýaqytsha esep komıssııasynyń tóraǵasy Gagık Melıkıan.
Sargsıan óz tarapynan depýtattarǵa qoldaý kórsetkenderi úshin alǵys bildirdi. «Men Armenııaǵa qyzmet etýge bar kúshimdi salamyn jáne búkil halyqtan da osyny kútemin», - dedi ol.
Burynǵy prezıdent Serj Sargsıannyń merzimi aıaqtalǵannan keıin Armenııada jańa Konstıtýsııa kúshine enedi. Jańa konstıtýsııa boıynsha bılik parlament pen úkimet qolynda bolady.
Sargsıan prezıdent bolyp saılanarǵa deıin Armenııanyń Ulybrıtanııadaǵy elshisi boldy. Sondaı-aq, ony prezıdenttik kandıdatýraǵa qazirgi memleket basshysy jáne respýblıkalyq partııanyń jetekshisi Serj Sargsıan usyndy. Jańa memleket basshysy óz qyzmetine 9 sáýirde kirisedi.
Sargsıan buryn parlamentte sóılegen sózinde, eldiń basqarý júıesi ekonomıkalyq jáne qoǵamdyq ómirde de eleýli ózgerister kezeńine jetkenin aıtqan bolatyn. Ol halyqty ulttyq birlikke shaqyryp, Armenııaǵa áleýmettik ádilettilik pen sybaılas jemqorlyqtyń joıylýy qajet ekenine toqtaldy. Al mańyzdy minderdiń qataryna azamattyq qoǵamnyń damýyn, bilim berý men demografııa salasyndaǵy máselelerdiń sheshilýin jatqyzdy.
REUTER
Ispanııada Búkilálemdik mobıldi kongress ótti
Ispanııanyń Barselona qalasynda 2018 jyldyń Búkilálemdik mobıldi kongres aıasynda telekommýnıkasııa kórmesi ótti. Onda 5G baılanysy tanystyryldy. Mamandardyń aıtýynsha, Kongress 5G dáýiriniń biz oılaǵannan da alys emestigin kórsetti.
Forým uıymdastyrýshylary sıfrly tehnologııalar qazirgi qoǵamdaǵy ózgeristerdiń negizgi faktory ekenin atap ótti. «Búkil álem boıynsha sıfrly tehnologııalardy damytýǵa asa mán berilip jatyr. Bul kongress – bizdiń jaǵdaıdy túsinetinimizdi jáne qoldaıtynymyzdy bildiredi. Osyndaı alańdar ıdeıa almasyp, tájirıbe almasyp, bir-birimizdiń tehnologııamyzben tanysyǵa múmkindik beredi», dedi olar.
Bir aıta keterligi, jyl saıyn uıymdastyrylatyn búkilálemdik kongrestiń ótip kele jatqanyna 30 jyl boldy. Oǵan uıaly baılanys operatorlary, búkil álem boıynsha mobıldi kontent satýshylary men óndirýshileri qatysady. Iri kompanııalar bul platformany mańyzdy jobalaryn tanystyrý úshin qoldanady.
VVS
Smartfonǵa táýelsizdikten qutqaratyn qosymsha jasaldy
Brıtanııada stýdentterdi smartfonsyz júrgeni úshin yntalandyratyn qosymsha shyǵaryldy. Hold baǵdarlamasyn Kopengagen bıznes mektebiniń úsh stýdenti qurastyrǵan. Olardyń aıtýynsha, bul qosymsha gadjetterge táýeldilikti joıýǵa kómektesedi. Bul qosymshany Norvegııa, Danııa, Shvesııa elderinde 120 myńnan astam adam qoladanady.
Búgingi tańda mamandar gadjetterge táýeldiliktiń órship bara jatqanyna alańdaýly. Tehas ýnıversıteti júrgizgen zertteýge sensek, smartfonnyń kózge kórinetin jerde turýynyń ózi eńbek ónimdiligin kemitip, adam reaksııasyna keri áser etedi. Al London ekonomıka mektebiniń zertteýlerinde mektep aýmaǵynda smartfon qoldanbaǵan oqýshylardyń emtıhandardy 6,4 paıyzǵa joǵary tapsyrǵany aıtylǵan. Sol zertteýler negizinde endi Ulybrıtanııanyń 170 ýnıversıteti Hold qosymshasyn iske qospaq. Sol arqyly stýdentter smartfon paıdalanbaǵan ár 20 mınýtqa 10 ball alatyn bolady. Qosymsha málimetteri tańǵy 7 men túngi 11 aralyǵyndaǵy ýaqytta esepke alynbaq.
Stýdentter osy qosymsha arqyly jınaǵan baldy túrli taýarlarǵa almastyryp, qyzmet aqylaryn tóleı alady.
