Kóktem shyǵa dostyq peıilmen kórshi Talas oblysynyń delegattary da Jambyl jerine keldi. Meımandardy «Aısha bıbi» keden beketinen Taraz qalasy ákiminiń orynbasary Kenjebek Oljabaı bastaǵan azamattar kútip aldy. Qyrǵyz aǵaıynǵa degen ystyq peıilin aıtysker aqyn Ernur Beısenov jyr arqyly bildirip, arnaý aıtty. Budan keıin saltanat Taraz qalasyndaǵy «Kóne Taraz» tarıhı-mádenı keshenindegi «Dostyq» úıinde jalǵasyn taýyp, qyrǵyzdarǵa oblys ákiminiń orynbasary Erqanat Manjýov bastaǵan jambyldyqtar qurmet kórsetti. Bul jerde túrli ult ókilderi ózderiniń dombyra, doıra, tar, chango, qomyz syndy ulttyq aspaptarymen óner kórsetip, kópshiliktiń kóńilin kóterdi. Al osyndaǵy halqymyzdyń ulttyq oıyndary, qolóner sheberleriniń týyndylary jáne ózge ult ókilderi salǵan kartınalar aıyrqalpaqty aǵaıynnyń tańdanysyn týdyrdy.
Qos oblys arasyndaǵy dostyq mereıtoıy «Rahmet saǵan, týǵan el!» atty kórkemónerpazdar konsertine ulasty. Sonymen qatar kópshilikke qazaq halqynyń darhan peıilin tanytatyn derekti fılm kórsetildi. Munda tarıhı sátter beınelenýmen qatar, ótken ǵasyrdyń basynda bir jarym mıllıon ózge ult ókilderiniń qazaq dalasyn panalap kelgen sáti kórsetildi. Budan keıin kelgen qonaqtarǵa Jambyl oblysy ákiminiń orynbasary Erqanat Manjýov oblys ákimi Asqar Myrzahmetovtiń sálemin jetkizip, Jambyl Jabaev beınesi beınelengen kilemsheni syıǵa tartty.
О́z kezeginde Talas oblysy gýbernatorynyń orynbasary Azııat Jarqynálıeva, Talas ólkelik telearnasynyń dırektory Ermek Úmbetov, Talas oblystyq mýzykalyq drama teatrynyń dırektory Qýan Estebekov sóz alyp, jambyldyqtarǵa degen jyly lebizderin jetkizdi. Sondaı-aq áýlıeatalyqtarǵa qyrǵyz halqynyń maqtanyshy «Manas» kitabyn syıǵa tartty.
Saltanatty shara barysynda Jambyl óńiriniń sahna sheberleri ásem ánnen shashý shashyp, bıshiler myń burala bı bıledi.
Hamıt ESAMAN,
«Egemen Qazaqstan»
Jambyl oblysy
