Foto: Rahym QOILYBAEV
Elimizdiń birinshi hanymy jáne barlyq balalardyń anasy Sara Alpysqyzynyń: «О́mir súrińizder, jaqsy kórińizder, keshirimdi bolyńyzdar. Júrekterińizden senim, úmit, mahabbat óshpesin. Sizderge baqyt, densaýlyq tileımin», degen izgi tilegi atyraýlyq balalarǵa qýanysh syılady.
«Shańyraqtaǵy» alty otbasynda 59 bala bar. Olar balalar aýylynyń dırektory Gúlsara Botataevany «Úlken mama» dep ataıdy. Tiline, dinine bólinbeı, bir úıde tatý-tátti ómir súrip jatqan balalar ónerge de jaqyn. Túrli úıirmelerge qatysyp, shyǵarmashylyqtaryn shyńdap júr. Aralarynda jas akterler de bar. Oblys ákimdiginiń qoldaýymen din isteri basqarmasy «Aqparattyq-taldaý ortalyǵynyń» tapsyrysy negizinde túsirilgen «Amanat» fılminde osy balalar úıiniń tárbıelenýshileri Rýslan Djabbarov, Bekzat Serikqalı, Nurdáýlet Shýdabaı basty rólderdi oınady. Merekege oraı olarǵa da alǵys hattar tabystaldy.
Árıne ár bala óz otbasynda, ata-anasynyń aıaly alaqanynda óskeni jaqsy. Biraq ómirde árqıly taǵdyr bar. Balalar aýylyn mekendeıtin balǵyndar qashanda memleket qamqorlyǵynda. Úlken júrekti azamattar men óńirdegi mekemeler, kásiporyndar da qaıyrymdylyq jasaýdan tys qalyp kórgen emes. Oblystyq kámeletke tolmaǵandardyń isteri jónindegi mamandandyrylǵan aýdanaralyq sotynyń tóraǵasy Aıgúl Táshenova, sýdıalar Naǵıma Ysqaqova, Ǵızatolla Otaruly, Sánııa Aıdarbaeva, Atyraý qalalalyq sotynyń sýdıalary Laýra Luqpanova, Medına Serikbaeva, Áıgerim Qarshyǵa sekildi abzal jandar Alǵys aıtý kúnine arnalǵan sharaǵa arnaıy kelip, balalarǵa syılyqtar tabystady. «Barbang» kúrd etno-mádenı birlestiginiń tóraǵasy Álı Seıdov pen «Edil-Jaıyq» qaraqalpaq etno-mádenı birlestigi tóraǵasynyń orynbasary Jetkerbaı Pishenbaı, Qazaqstan halqy Assambleıasy Jastar qanatynyń tóraǵasy Alekseı Ishın, «Jastar resýrstyq ortalyǵy» basshysynyń orynbasary Aıdana Balashevalar da balalarǵa bazarlyqtaryn ala keldi. Eriktiler toby konserttik baǵdarlama qoıdy.
– Mundaı sharalar balalarǵa mereke syılaıdy, – deıdi Gúlsara Botataeva. – «Úıimizge qonaq keledi» dep balalar aldyn ala daıyndalady. Kishkene kezderinen osy tárbıeni alyp óskennen keıin olarǵa qoǵamǵa beıimdelý, jetistikterge jetý qıynǵa soqpaıdy. Túrli baıqaýlarda jeńimpaz atanǵan maqtanyshtarymyz bar. Balalar aýylynyń qabyrǵasynan ketse de, ómirden óz oryndaryn taýyp, elge paıdasyn tıgizip júrgen jastardy úlgi etip otyramyz. Balalar aýyly jáne jasóspirimder úıine oblys ákimi Nurlan Noǵaev ta jıi keledi. Bul jerde baqytty balalyq shaqty qamtamasyz etýge qajet jaǵdaıdyń bári jasalǵan. Bıyl jańa ǵımarattyń qurylysy bastalady degen qýanyshty jańalyǵymyz bar.
«Qýantsań, balany qýant» degen osy. О́zderine jasalǵan jaqsylyqqa ádemi kıimderin kıip, dóńgelene bılep, shattana án shyrqap alǵys aıtqan balǵyndarǵa qarap otyryp, osylaı oılaısyń. Taǵdyr túrli bolsa da, balanyń bári baqytty, óıtkeni olardy aıalaıtyn el bar, jany izgi jaqsylar bar.
Baqytgúl BABASh,
«Egemen Qazaqstan»
ATYRAÝ
