Sonymen ádilqazylar alqasynyń sheshimimen onlaın júıesindegi ashyq daýys berý barysynda sulýlyq konkýrsynyń jeńimpazy bolyp Shyǵys Qazaqstan oblysynyń arýy, jerlesimiz semeılik Dıana Baıjumanova ataldy. Dıana Qazaqstan Respýblıkasy Ulttyq Ulany «Shyǵys» óńirlik qolbasshylyǵynyń 5511 áskerı bóliminde tabysty eńbek etýde. Efreıtor Dıana Baıjumanova Semeı qalasynda týǵan. Ulttyq ulan sapynda 2017 jyldan bastap, qarjy qyzmetiniń bas mamany retinde jumys istep keledi eken.
Aıta ketý kerek, QR Ulttyq ulanynyń qataryna semeılik sulý bir kúnde kele salmady. Ol osy bólimde taban aýdarmaı 15 jyl qyzmet etken óz anasynyń izimen júrip, áskerı qyzmetti jalǵapty.
Orta mektepti támamdasymen Dıana Semeı qalasyndaǵy qarjy-ekonomıkalyq kolledjine «Esep jáne aýdıt» mamandyǵy boıynsha bitiredi. Sodan keıin jas maman retinde, elime eńbek etsem degen naqty maqsatty ustanady. Armııa qatarynda júrip, Dıana Qazaq ınnovasııalyq ýnıversıtetinde negizgi mamandyǵy boıynsha joǵary bilimdi syrttaı alyp shyǵypty.
- Áskerı qyzmetti jaqsy kóremin,-dedi Dıana Baıjumanova,-adamdy tártip pen jınaqylyqqa úıretip, Otanǵa degen súıispenshilikti arttyrady. Adamdy naǵyz adam jasaıtyn armııa dep bilemin.
Osynaý jaýapkershiligi mol jumysynda ádemi arý qyz erlerden qalyspaı eńbek etetindigi taǵy bar. Názik jaratylysyna qaramastan áskerı qyzmettiń barlyq júgin kótere biletin jan. Tipti sapqa turýdyń ıkemdiligin ıgerip, sporttyq jarystarǵa qatysyp, qarý-jaraq ustaýdyń barlyq qyr-syryn meńgergen. Tipti bunyń bárin aldyńǵylardyń qatarynda oryndaıtynyn qaıtersiń. Klassıkalyq ádebıetke jany qushtar, óleń shyǵaǵarǵandy da jaqsy kóredi. Súıikti maqaly «general bolýdy armandamaǵan sarbaz sarbaz emes» degen naqyl sóz eken.
Raýshan Nuǵmanbekova,
sýret avtordyki.
Semeı
