AQSh-taǵy alǵashqy ondyqqa kiretin Nıý-Iorktiń Kýıns aýdanyndaǵy Kai Leung's Shotojuku (Kaı Lýng's Shotodzıýký) karate mektebi Qazaqstannan kelgen jas qyzdyń ónerine birden kóńil aýdarǵan. О́ıtkeni Etel Týmysh Almatyda 8 jasynan bastap karateniń «shıto-rıý» ádisimen aınalysqan. Birneshe jyl jattyǵýdan soń ol tipti Almatyda 2-orynǵa ıe bolady. Al elimizdiń syrtqy saıasaty qyzmetindegi ákesi Nıý-Iorkke jumysqa aýysqanda, Etel de áke-sheshesimen birge Qurama Shtattarǵa qonys aýdarady. Jańa mektepte Etel karateniń «shotokan» dep atalatyn túrin úırenip, «kata» - «kóleńkemen kúres» qozǵalysyn ushtaıdy. Sóıtip tabandylyq pen tynymsyz jattyǵýdyń arqasynda ol Amerıkadaǵy bedeldi jarystarda ozyq shyǵady.
Ár adamnyń jetistigine ár túrli nárse sebep bolyp jatady. Eteldiń karatege kelý sebebi de qyzyq eken. Ol týraly ózi bylaı deıdi:
- 1-synypta oqyǵanda, meni Mıras esimdi bala renjitip, jábir kórsetýshi edi. Birde odan óz qylyǵy úshin keshirim suraýyn talap etkende, ol maǵan tarpa bas salǵany esimde. Sol kezde eshnárse isteı almaı, kóp jylap, qatty qamyqtym. Sodan shesheme kelip, Mırastyń renjitkenin aıttym. Sonda sheshem «ózińdi qorǵap úırený kerek», - dep, karatege aparǵan. Mine endi sol balaǵa raqmet aıtqym keledi. Eger ol renjitpese, men jetistikke jetpes edim,- deıdi karateden chempıon Etel Týmysh.
Eteldiń basty jeńisi - Ońtústik Karolınada ótken AQSh chempıonatynda «kobýdo» qarýymen saıysta birinshi oryndy ıelenýi. Otandasymyz Pıttsbýrgte ótken jarysta «kýmıte» boıynsha ekinshi, «kate» boıynsha úshinshi, al «kóleńkemen urys» ádisi boıynsha qola medal enshileıdi. 2016 jyly ol Fıladelfııadaǵy ashyq birinshilikte absolıýttik chempıon ataǵyn jeńip alady. Etel bedeldi sanalatyn Nıý-Iork shtatyndaǵy dástúrli shotokan-karate chempıonatynda da jeńiske qol jetkizgen.
- Bir ret «saı» dep atalatyn ádis boıynsha temir qarýmen óner kórsetip jatqanda, bolmashy qatelik úshin jarystan shyǵaryp tastaı jazdady, -deıdi Etel Týmysh. «О́ıtkeni meniń basymda shashymdy jınastyrǵan úsh rezeńke bolǵan. Al tártip boıynsha ol ekeýden aspaýy tıis. Biraq meniń jarysty ary qaraı jalǵastyrýyma ruqsat berip, altyn medal ıelendim».
Eteldi karateden ataqty chempıon Kaı Lýng daıyndaıdy. Halyqaralyq shotokaı federasııasynyń negizin qalaýshylardyń biri Gonkongten AQSh-qa 1970 jyly kelgen. 80 jyldary álemdegi 10 kúshti karateshini shyńdady. Onyń Ken Lýng esimdi shákirti álemge áıgili kınojuldyz Djekı Chanmen birneshe fılmge tússe, taǵy bir tálimgeri Devı Santos esimdi aktermen birge jetekshi rólde oınaǵan. Sóıtip Kaı ustaz - AQSh-ta kóp chempıondar daıyndaǵan sheber.
Kaı Lýngtiń aıtýynsha, Etel munda aralas shyǵys jekpe-jegin úırený úshin kelgen. «Karateni jaqsy kóredi. Kóp ter tógip, AQSh chempıony boldy. Men ony maqtan tutamyn. Qazaqstanda qazir jaqsy karateshiler bar. Etel jattyǵýyn Qazaqstanda jalǵastyratyn bolady», -deıdi jattyqtyrýshy.
Etel Týmyshtyń endigi armany Qazaqstan atynan Olımpıadaǵa qatysyp, Karateden altyn júlde enshilep qazaqtyń abyroıyn asqaqtatý.
