I. Kavabatanyń aıtýynsha, granttar Japonııa úkimetiniń «KUSANONE» jobasy sheńberinde bólinip otyr jáne ol adamdardyń ómir sapasyn arttyrýǵa baǵyttalǵan.
«KUSANONE» jobasy Japonııa úkimetiniń resmı kómek kórsetý baǵdarlamasy bolyp tabylady. Ol medısınalyq uıymdar, bilim berý mekemeleri sııaqty kommersııalyq emes uıymdarǵa qoldaý kórsetý arqyly adamdardyń ómirin jaqsartý maqsatynda júzege asyrylady. Baǵdarlama qarapaıym halyqtyń áleýmettik-ekonomıkalyq damýyna tikeleı yqpal etetin jáne tabysy tómen uıymdardyń jobalaryn qoldaýǵa baǵyttalǵan.
«Bıyl biz jeti jobany qarjylandyrýǵa grant bólip otyrmyz. Ol jobalar negizinen bilim alý mekemeleriniń terezeleri men jylytý qurylǵylaryn jańartýǵa baǵyttalǵan. Sonyń nátıjesinde biz jas jetkinshekterdiń yńǵaıly jáne jaryq jerde sapaly bilim alýyna múmkindik jasaımyz. Baǵdarlamanyń basty maqsaty – adamzat qaýipsizdigin qamtamasyz etý. 1997 jyldan beri atalǵan baǵdarlama aıasynda Qazaqstanda jalpy somasy 6 034 632 AQSh dollary bolatyn barlyǵy 85 joba qarjylandyryldy», dedi elshi I. Kavabata.
Bıyl Japonııa elshiliginiń granttary – terezelerdi jóndeý jumystary boıynsha Semeı qalasynyń úsh birdeı orta mektebine berildi. Sonymen qatar jylytý júıesin jóndeý úshin Mańǵystaý oblysynyń Shahtınsk orta mektebine, Jańaózen qalasynyń «Qyzmet kórsetý jáne jańa tehnologııalar» kolledji jáne Mańǵystaý aýylynyń №1 jalpy orta bilim berý mektebine qarajat bólindi. Sondaı-aq Jetiqara aýdanynyń psıhonevrologııalyq aýrýlary bar jáne tirek-qımyl apparattary zaqymdalǵan múmkindigi shekteýli balalarǵa arnalǵan kúndizgi kútimdi keńeıtý jobasyna 32 326 AQSh dollary kóleminde qarjy qarastyrylǵan.
Atalǵan is-sharaǵa jeti mekemeniń basshylyǵy qatysty. Qazaqstannyń shalǵaı aımaqtarynan kelgen olar Japonııa elshiligine óz alǵystaryn bildirdi. Sondaı-aq olar bul joba eki el arasyndaǵy birlikti nyǵaıtýǵa, oqýshylardyń qolaıly jerde sapaly bilim alýyna úlken qoldaý bolǵanyn atap ótti.
Japonııa elshiligi óz kezeginde «Shóp tamyry» baǵdarlamasy áleýmettik máselerdi sheshýde, halyqtyń áleýmettik jaǵdaıyn jaqsartýǵa óz úlesin qosady dep úmittenedi. Budan bólek, joba eki eldiń yntymaqtastyq qarym-qatynastaryn odan ári bekitýge sebepshi bolary sózsiz, deıdi.
«Eki el arasyndaǵy yntymaqtastyq Qazaqstan eli táýelsizdik alǵan sátten bastaldy. Japonııa úkimeti adam ómiriniń qaýipsizdigin qamtamasyz etýge kóp kóńil bóledi. Dál osy baǵytta biz 1997 jyldan bastap «Shóp tamyry» jobasyn iske asyra bastadyq. Bul joba eki el arasyndaǵy dostyq qarym-qatynastyń odan ári nyǵaıýyna óz úlesin qosady dep úmittenemin», dedi Itıro Kavabata.
Mádına JÁLELQYZY,
«Egemen Qazaqstan»
