Búgin Qazaqstan Parlamenti joǵarǵy Palatasynyń Tóraǵasy Indonezııanyń Vıse-prezıdenti Iýsýf Kallamen kezdesti. Taraptar saıası, ekonomıkalyq jáne gýmanıtarlyq salalardaǵy ekijaqty qatynastardy odan ári damytýdyń keleshegin talqylady.
Senat Tóraǵasy Indonezııa Vıse-prezıdentiniń 2017 jylǵy qyrkúıektegi saparynyń nátıjeli bolǵanyn jáne ol bastaǵan delegasııa Islam yntymaqtastyǵy uıymynyń Astanadaǵy ǵylym jáne tehnologııa jónindegi sammıtiniń tabysty ótýine úles qosqanyn joǵary baǵalady.
Q. Toqaev toleranttyqty, dinderdiń, mádenıetter men órkenıetterdiń únqatysýyn ilgeriletý máseleleri boıynsha bizdiń elderimiz arasyndaǵy tájirıbe almasýdyń paıdaly ekenin atap ótti. Osyǵan baılanysty ol Indonezııa Prezıdenti Djoko Vıdodonyń 2018 jyly qazanda Qazaqstan astanasynda bolatyn Álemdik jáne dástúrli dinder lıderleriniń Sezine qatysýyna Qazaqstannyń yqylasty ekenin aıtty.
Senat Tóraǵasy Memleket basshysynyń «Bes áleýmettik bastamasy» aıasynda júzege asyrylyp jatqan, elimizdiń azamattarynyń ál-aýqatyn odan ári jaqsartýǵa baǵyttalǵan reformalar týraly, sondaı-aq Qazaqstannyń saıası júıesi men rýhanı ómirin jańǵyrtý jaıynda ındonezııalyq tarapty habardar etti.
Iýsýf Kalla óz kezeginde onyń eli Qazaqstan delegasııasynyń saparyna zor mańyz beretinin aıta kelip, kólik, logıstıka, ınvestısııa, qarjy, týrızm jáne mádenıet salalaryndaǵy ózara is-qımyldy údetýge nazar aýdaryp otyrǵanyn aıtty.
