– Biz Qazaqstanǵa, jas elordamyz – Astanaǵa kelgenderińiz úshin rızashylyq bildiremiz. Búgingi kezdesýimizdiń ekijaqty qatynastar jylnamasyndaǵy mańyzy erekshe, – dedi Qazaqstan Prezıdenti.
Memleket basshysy Tájikstan Qazaqstannyń mańyzdy strategııalyq áriptesi bolyp sanalatynyn aıryqsha atap ótip, osy jyldar ishinde eki el arasynda tatý kórshilik ári senimdi qarym-qatynas ornaǵanyn aıtty.
– Biz óńirlik jáne jahandyq deńgeıde ózara yqpaldasyp kelemiz. Aramyzda 80-nen astam sharttar men kelisimderdi qamtıtyn aýqymdy quqyqtyq baza qalyptasqan, – dedi Qazaqstan Prezıdenti.
Nursultan Nazarbaev ekijaqty qarym-qatynastardy odan ári nyǵaıtýǵa baǵyttalǵan, búgin qol qoıylatyn kelisimderdiń mańyzdylyǵyn atap ótti.
– Qarym-qatynasymyzdyń 25 jyly – dostyqtyń jáne bir-birimizge qoldaý kórsetýimizdiń tarıhy. Búgin biz negizgi qujatqa qol qoıamyz. Bul – bizdiń ortaq jumysymyzdy qorytyndylap, keleshektegi basymdyqtarymyzdy aıqyndaıtyn birlesken málimdeme, – dedi Memleket basshysy.
Emomalı Rahmon Nursultan Nazarbaevqa joǵary marapat – «Parasat» ordenin tabys etkeni úshin alǵys aıtyp, Qazaqstan men Tájikstan arasyndaǵy qarym-qatynasty nyǵaıtýǵa qosqan úlesin joǵary baǵalaǵanyna shynaıy rızashylyǵyn bildirdi.
– Qazaqstanmen aradaǵy qarym-qatynas Tájikstannyń syrtqy saıasatynda jetekshi oryn alady. Biz ony qarqyndy túrde damytýǵa nıettimiz. Tájikstan halqy da jáne jeke ózim de halqymyzdyń basyna qıyn kún týǵanda qoldaý bildirip, ekonomıkalyq turǵydan kómek kórsetkenderińizdi eshqashan umytpaımyz, – dedi Tájikstan Respýblıkasynyń Prezıdenti.
Sońynda E.Rahmon senimdi saıası platforma men myqty quqyqtyq bazaǵa negizdelgen ekijaqty yntymaqtastyqtyń tabysty damyp kele jatqanyn atap ótti.
