Phenchhandaǵy Paralımpıada oıyndarynda Aleksandr Kolıadın shańǵy sportynan 1,5 kılometrlik sprıntte atalǵan qashyqtyqty 4:19.7 mınýtta baǵyndyryp, márege birinshi jetti. Ekinshi oryn japonııalyq Ioshıro Nıttaǵa buıyrsa, qola júldeni Mark Arends mise tutty.
Sóıtip Aleksandr Kolıadın Qazaqstannyń qysqy Paralımpıada tarıhyndaǵy tuńǵysh altyn júlde ıelengen sportshy atandy. Bul Kolıadınniń ekinshi paralımpıadasy. Ol tórt jyl buryn Sochıde ótken oıyndarǵa qatysyp, 13-oryn ıelengen bolatyn. Qazaqstan quramasynyń sportshylary paralımpııalyq oıyndarǵa 1994 jyldan beri turaqty túrde qatysyp keledi.
Aleksandr Kolıadınniń altyn medali el quramasynyń jalpykomandalyq esepte 15-orynǵa kóterilýin qamtamasyz etti. Bıylǵy paralımpııalyq oıyndarǵa Qazaqstan quramasynan sporttyń eki túrinen alty sportshy qatysyp jatyr. Bul da – biz úshin rekordtyq kórsetkish!
Kolıadın tarıhı jeńisinen keıin otandyq BAQ ókilderine suhbat berip, jeńisine qýanyshty ekenin bildirdi. «Bul jetistikke jetý úshin ótken paralımpıadadan beri uzaq ýaqyt daıyndaldym. О́te qıyn jattyǵýlardyń arqasynda osy nátıjege jettim dep oılaımyn. Paralımpıadadan keıin de halyqaralyq dodalarda el namysyn qorǵaımyn degen úmitim bar. Qoldaý bildirip, úmit artqan barlyq qazaqstandyqtarǵa óz alǵysymdy bildiremin. Dál qazir erekshe sezimde turmyn. Meni shańǵy sportyna baýlyǵan Nıkolaı Chebotkoǵa da erekshe alǵys aıtamyn», dep aǵynan jaryldy Paralımpııa oıyndarynyń chempıony.
Aleksandr Kolıadın 1973 jyly Qostanaı qalasynda týǵan. 1997 jyly jol apatyna ushyrap, bir aıaǵynan aıyrylǵan. Bul jaǵdaıdan keıin Kolıadın uzaq ýaqyt óz-ózine kele almaı júrgen. Degenmen, bala kezinde kúrespen shuǵyldanyp, sportqa ıkemi baryn baıqaǵan Sergeı Revýskıı oǵan shańǵy sportymen shuǵyldanýǵa kómektesken. Sportshy 2012 jyly Kókshetaýda ótken Qazaqstan chempıonatyna qatysyp, el birinshiliginiń jeńimpazy atanǵan. Sol ýaqyttan beri Aleksandr elimizdiń namysyn halyqaralyq arenalarda abyroımen qorǵap keledi.
2017 jyldyń jazynda Aleksandr Germanııada oqý-jattyǵý jıynyna qatysyp, sol jaqta ózine yńǵaıly protez aıaq jasatady. Osydan soń ol aıaǵyn erkin qımyldatyp, shańǵy sportynda birqatar jeńiske jete bastaıdy. Ol uzaq ýaqyt Nıkolaı Stepınniń qol astynda jattyqqan. Qazirgi jattyqtyrýshysy – Vasılıı Kolomıes.
Aleksandr Kolıadın búginde Qazaqstan chempıonatynyń alty dúrkin jeńimpazy. Sondaı-aq ol byltyr Germanııada ótken álem chempıonatynda estafetalyq jarysta altynshy oryn ıelengen. Bul Kolıadınniń qazirgi kezdegi eń úzdik nátıjesi. Aleksandr «Qıyndyqtardan qorqýdyń ornyna jańa qıyndyqtardy izdeımin» degen ustanymmen ómir súretin sportshy.
Álı BITО́RE,
«Egemen Qazaqstan»
