Sońǵy jyldary elimiz turǵyzylǵan baspana boıynsha rekordtyq kórsetkishterge qoljetkizilýde. Solaı bola tursa da baspanaǵa muqtaj jandar áli de jetkilikti. Endi «7 – 20 – 25» baǵdarlamasy boıynsha ıpotekalyq nesıeniń jyldyq ósim mólsheri 7 paıyzdan aspaıdy. Al alǵashqy jarna burynǵydan áldeqaıda jeńil – 20 paıyz ǵana. Sonymen birge onyń merzimi 25 jylǵa uzarýy sebepti aýyrtpalyǵy da baıqalmaıtyn bolady. Sóz joq, bul baǵdarlama óz kezeginde turǵyn úı qurylysynyń jańa serpinmen alǵa basýyna tikeleı áser etetin bolady.
Osy rette bizdiń oblysta óńir turǵyndarynyń áleýmettik osal tobyn meılinshe qoljetimdi turǵyn úımen qamtamasyz etýdi maqsat etip, 3 jylǵa eseptelgen «Orda» turǵyn úı qurylysynyń jol kartasyn ázirlegenin atap ótken jón. Nesıelik turǵyn úıdiń kóp balaly otbasylar, múmkindigi shekteýli az qamtylǵan toptardyń barlyǵyna birdeı qoljetimdi emestigin eskerip, «Nurly jer» baǵdarlamasy aıasynda salynyp jatqan nesıelik turǵyn úılerdi jergilikti bıýdjet esebinen satyp alýǵa jyl saıyn oblystyq bıýdjetten 2 mlrd teńgeden qarjy bólý týraly sheshim qabyldandy.
Syr óńirinde baspana qurylysy jyl ótken saıyn óristeı túsýde. 2017 jyly 1983 páterge arnalǵan 47 kóp páterli turǵyn qurylysy júrse, sonyń ishinde memleket qarjysy esebinen 1600 páterli 36 úı paıdalanýǵa berildi.
Arnur NURMAǴANBETOV,
Qyzylorda oblystyq qurylys, sáýlet jáne qala qurylysy basqarmasy basshysynyń orynbasary
