Qalyń qardy kúrep qoıyp, jasandy alańdaǵy oıyndardy bastaǵan Pavlodar qalasynda birinshiliktiń alǵashqy goly da soǵyldy. Oıynnyń nebári 5-mınýtynda Pavel Shabalın esep ashyp, «Ertisti» alǵa shyǵardy. Kúnniń sýyqtyǵyna qaramastan «Ertis» – «Atyraý» oıynyna birshama jankúıer keldi. Tipti olardyń biri match barysynda alańǵa júgirip shyqty. Jankúıerlerdiń fýtboldy saǵynǵandyǵynyń bir belgisi bolar, jalpy 6 oıynǵa 30 myń jankúıer kelipti. Aıtpaqshy, álgi alańǵa júgirip shyqqan názik jandy kórermenimiz 5 aılyq kórsetkish kóleminde aıyppul tóledi. Al eń bastysy ıspanııalyq bapkeri bar pavlodarlyq «Ertis» 2:1 esebimen jeńiske jetti. Esep 2:1 bolǵanymen, úsh goldy da «Ertis» oıynshylary soqty. Dorý Popodıýk esepti eselegennen keıin, Aleksandr Kıslısın óz qaqpasyna dop soǵyp aldy.
Kún raıynyń yńǵaılylyǵyna baılanysty shyraıly Shymkent jeri ádettegideı alǵashqy birneshe týrdy óz alańynda ótkizedi. О́zge qalalarda kún jylyǵanyn kútip júrip, kóp upaı jınap alatyn ádeti emes pe? «Ordabasy» bul joly da ǵaıyptan taımaı, Qaraǵandydan kelgen «Shahterdi» 2:1 esebimen jeńdi. Maýsymaralyq úziliste Perm qalasynyń «Amkar» komandasyna aýysyp kete jazdaǵan Erkebulan Tuńǵyshbaev esep ashty. Al odan keıin Qazaqstanǵa qaıta oralǵan chernogorııalyq Damır Koıashevıch tarazy basyn teńestirdi. Jeńiske degen jiger kórsetken Georgıı Dermendjıevtiń shákirtteri esepti 2:1 qylyp, jeńisti julyp áketti. Gol avtory Ivan Nagaev.
Almatydaǵy «Ortalyq» stadıonda sensasııa tirkele jazdady. Premer-lıgaǵa qaıta oralǵan «Qyzyljar» gol soǵyp, almatylyqtardy tyǵyryqqa tiredi. Alaıda, alańǵa almasyp kirgen Isael men Arshavın oıyn aıaqtalýǵa 10 mınýt qalǵanda 2 gol soǵyp «Qaıratqa» 3 upaı áperdi. «Qyzyljar» kem degende teń nátıjege qol sozýǵa laıyqty edi. Jalpy alǵanda premer-lıgamyzdyń alǵashqy týrynda teń nátıje múlde tirkelgen joq.
Jer jánnaty Jetisýda taldyqorǵandyq jankúıerler óz komandasynyń álsiz ekenine kóz jetkizdi. Jańbyrly kúni alystan jaıbaraqat soqqy jasaǵan Baýyrjan Turysbek «Tobyl» úshin mańyzdy 3 upaı ákeldi. Bul jerde qaqpashy Djýrahon Babahanovtyń óreskel qateligi oryn aldy. Shamasy Dmıtrıı Ogaı men Rýslan Baltıev tandemi taldyqorǵandyq klýbta kóp qyzmet ete qoımaıdy-aý degen tujyrymǵa keldik. Qyrýar qarjy bólinip, premer-lıgaǵa qaıta oralyp turǵanda oblystyń abyroıyn shashý eshkimge de kerek emes.
Stanımır Stoılov ketkeli beri tizgindi qolyna alǵan Grıgorıı Babaıan jarap tur. Ol bapker bolǵaly beri «Astana» eki oıyn ótkizdi. Ekeýinde 3:0 esebimen jeńdi. Aldymen Sýperkýbokta «Qaıratty», endi mine birinshiliktiń birinshi týrynda «Aqjaıyqty». Bul matchta kózge túsken sol baıaǵy Marın Tomasov. Horvatııalyq legıoner aldymen aıyp dobynan esep ashsa, keıinnen buryshtama kóterip, onyń pasynan Sergeı Malyı esepti eseleı tústi. Al oıynnyń núktesin jaraqatynan aıyǵyp shyqqan Serikjan Mujyqov qoıdy.
Qyzyqtyń kókesi Qyzylordada boldy. Jergilikti «Qaısar» jastary 21-ge tolmaǵan jas fýtbolshylardan jeńilip qaldy. «Aqtóbe» komandasynyń basynan ótip jatqan qıyndyq barlyǵyna belgili. Klýb qaryzǵa belshesinen batyp, jańadan alǵan fýtbolshylaryn tirkeı almaı, alańǵa shyǵarmady. Sebebi ótken jyldary ózge legıonerlerdiń jalaqysyn bermegen. Sondyqtan osy oıynǵa Samat Smaqov basqaratyn klýb qosalqy quramymen keldi. Keldi de 1:0 esebimen jeńiske jetti. «Aqtóbelik» shabýylshy Abat Áıimbetovti shalyp qulatqany úshin tóreshi qyzylordalyqtardyń qaqpasyna 11 metrlik aıyp dobyn belgiledi. Aslanbek Kákimov esh oılanbastan jeńisti goldy soqty. Aıtpaqshy, osy oıynda «Aqtóbe» sapynda 10 qazaq fýtbolshysy alańǵa shyqqanyn aıta keteıik.
Sóz sońynda sandardy sóıletsek. 6 oıynda nebári 3-aq esep tirkeldi. Iаǵnı, 3 match 2:1, 2 oıyn 0:1, bir match 3:0 bolyp aıaqtaldy. Al barlyǵy 14 gol soǵylyp, onyń teń jartysyn, ıaǵnı 7-ýin legıonerler saldy. Bul ótken jylǵy birinshi týrmen salystyrǵanda anaǵurlym kóp. 14 doptyń 6-ýy birinshi taımda soǵylsa, qalǵan 8-i ekinshi taımnyń enshisinde. Endi kelesi týr oıyndary 17 naýryz kúni ótedi.
Ermuhamed MÁÝLEN,
«Egemen Qazaqstan»
