Nursultan Nazarbaev Shavkat Mırzııoevtiń ekijaqty qatynastardy damytý men nyǵaıtýdaǵy rólin erekshe atap ótti.
– Siz memleket basshysy bolǵaly ózińizben birneshe ret júzdestik, ózara talqylaǵan máselelerdiń bári júzege asyrylyp, jumystar atqarylyp jatyr. Bıyl kóp jumys istedińiz, kórshilermen ózara qarym-qatynasty rettedińiz, ondaǵan jyldar boıy sheshilmegen máselelerdi sheshtińiz. О́zbekstanda atqaryp jatqan orasan zor jumystaryńyz úshin rızashylyǵymdy bildiremin jáne bul óńirimizdegi barlyq elderge áser etedi, – dedi Qazaqstan Prezıdenti.
Nursultan Nazarbaev búgingi konsýltatıvtik jumys kezdesýiniń mańyzdy sıpatyn atap ótti. Ony ótkizý jónindegi ıdeıany О́zbekstan Prezıdenti usynǵan bolatyn.
– Biz búgin barlyq áriptesterimizben birge ekonomıkalyq problemalar men kúndelikti máselelerdi talqylap, sheshý úshin kezdesip otyrmyz. Bıyl mundaı kezdesýler kóp bolmaq: ózińiz bastamashy bolǵan Aýǵanstan jónindegi kezdesý, Túrikmen tarapy usynǵan Aral teńizine qatysty kezdesý jáne basqa da is-sharalar ótedi, – dedi Nursultan Nazarbaev.
О́zbekstan Prezıdenti Qazaqstanǵa kelgenine rızashylyq bildirip, Ortalyq Azııa elderi basshylarynyń konsýltatıvtik jumys kezdesýiniń az ýaqyt ishinde uıymdastyrylǵany úshin Nursultan Nazarbaevqa alǵys aıtty.
– Búgin men Sizge konsýltatıvtik kezdesý ótkizý jónindegi О́zbekstan bastamasyn qoldaǵanyńyz úshin alǵys aıtqym keledi. Nursultan Ábishuly, Siz táýelsizdiktiń alǵashqy kúnderinen bastap árdaıym ıntegrasııanyń jaqtaýshysy bolyp, barlyq kezdesýlerde birigý, yntymaqtasý jáne aralasý jóninde aıttyńyz, – dedi О́zbekstan Prezıdenti.
Shavkat Mırzııoev ekijaqty yntymaqtastyqtyń ózekti máselelerin sheshý isindegi Nursultan Nazarbaevtyń saıası erik-jigerin atap ótti.
– Búginde temirjol tasymaly 44 paıyzǵa artqanyna, jalpy elderimiz arasyndaǵy taýar aınalymynyń eki mıllıard dollarǵa jetkenine qýanyshtymyn. Sizben ózara keliskenimizdeı, bul kórsetkishti bes mıllıard dollarǵa deıin jetkizemiz, – dedi О́zbekstan Prezıdenti.
