Sýretti túsirgen Erlan OMAR
Biz, Qazaqstan Respýblıkasy, Qyrǵyz Respýblıkasy, Tájikstan Respýblıkasy, Túrikmenstan, О́zbekstan Respýblıkasy Prezıdentteri Ortalyq Azııa halyqtaryn búkil óńirimizge ortaq Naýryz merekesimen shyn júrekten quttyqtaımyz.
2010 jylǵy 23 aqpanda Birikken Ulttar Uıymy Bas Assambleıasynyń qararymen bul meıram Naýryz – Halyqaralyq kúni dep tanylǵanyn jáne ony IýNESKO-nyń Adamzattyń materıaldyq emes mádenı muralary tizimine engizgenin erekshe atap ótemiz.
О́ziniń myńjyldyq tarıhynda Naýryz meıramy tabıǵattyń jáne qoǵamnyń qaıta túleýi men jańarýynyń, adamzat balasynyń rýhanı tazarýy men ózin-ózi damytýynyń nyshanyna aınaldy. Osy shýaqty da qasterli mereke amandyqty, birlikti, baýyrlastyq pen ózara qoldaýdy tanytyp, bizdiń elderimizdi biriktiretin barlyq mádenı-tarıhı qundylyqtardy dáripteıdi. Bul – ortaq ata-babamyzdan qalǵan uly mura. Biz ony saqtaýymyz jáne damytýymyz qajet.
Naýryzdy toılaý kezeńi barlyq zamanda adamı jáne otbasylyq qarym-qatynastardyń, dostyq pen tatý kórshilik baılanystardyń nyǵaıýymen, kórshiler arasyndaǵy erekshe qonaqjaılylyqtyń kórinis tabýymen qatar kelgen. Bul ortaq tarıh, mádenıet, dástúr, turmys arqyly birikken elderimiz úshin qazir de mańyzdy.
Osy meıram qarsańynda búkil óńirimizdiń qaýipsizdigin, turaqtylyǵy men ornyqty damýyn qamtamasyz etý maqsatymen óńirlik yntymaqtastyqqa, ózara qoldaýǵa, ózekti máselelerdi birlesip sheshýge nıet bildirýimizdiń zor sımvoldyq máni bar.
О́zara tıimdi saýda-ekonomıkalyq jáne ınvestısııalyq yntymaqtastyq, óńirlik tranzıt-kólik ınfraqurylymnyń keńeıýi, sý-energetıkalyq, azyq-túlik áleýetterin utymdy ıgerý, óndiris jáne óńdeý salalaryn damytý, ozyq tehnologııalar men ınnovasııalardy qoldaný, sıfrlyq ekonomıka jolyndaǵy ilgerileý Ortalyq Azııa elderi ál-aýqatynyń turaqty túrde ósýin qamtamasyz etýge septigin tıgizedi.
Biz halyqtarymyzdyń arasyndaǵy ózara qurmet, dostyq pen baýyrlastyq qatynastardy saqtaýǵa jáne nyǵaıtýǵa degen tarıhı jaýapkershilikti sezine otyryp, mádenıet pen óner, bilim men ǵylym, týrızm jáne sport salalaryndaǵy ózara yqpaldastyqty tereńdetýge shaqyramyz.
Kóktemgi kún men túnniń teńelýi, rýhanı tazarý men jańarý merekesiniń qarsańynda Qazaqstan, Qyrǵyzstan, Tájikstan, Túrikmenstan, О́zbekstan halyqtaryna, sondaı-aq jer betindegi barsha halyqtarǵa beıbitshilik, molshylyq jáne qýanysh tilep, ósip-órkendeýlerine nıettestigimizdi bildiremiz.
Naýryz meıramy ár úıge amandyq pen baq-bereke ákelsin!
