- О́zbekáli Jánibekov oqýlaryna meniń shákirtterim osymen ekinshi márte qatysyp otyr. Byltyr bizdiń ýnıversıtettiń eki stýdenti Túrkistanǵa barǵan edi. Bıyl bes stýdent sapar shegip, úsheýi baıandama jasady, - deıdi Batys Qazaqstan ınnovasııalyq-tehnologııalyq ýnıversıtetiniń professory Dámetken Súleımenova.
1991 jyly ashylǵan Qoja Ahmet Iаssaýı atyndaǵy halyqaralyq qazaq-túrik ýnıversıtetinde álemniń 32 elinen kelgen jastar bilim alady. Qazirgi tańda ýnıversıtette 10 myńǵa jýyq stýdent qazaq, túrik, orys jáne aǵylshyn tilderinde oqyp júr eken. Mundaı úlken ortamen jaqyn aralasyp, bilim báıgesine birge túsý oraldyq stýdentter úshin óte mańyzdy bolmaq.
Bir qyzyǵy, jas ǵalymdar jol aqysyn ózderi kótergen. Al Túrkistandaǵy qonaq úı, tamaqtaný, t.b. shyǵyndy konferensııany uıymdastyrýshylar óz moınyna alypty. «Túrkistandyqtar bizdi iltıpatpen qarsy aldy. Tarıhy mol qalany aralap, Otyrar qalasynyń ornyn, Arystanbab pen Ázireti sultan kesenelerin zııarat etip, tarıhı tanymymyzdy keńitip qaıttyq» deıdi oraldyq shákirtter.
Qoja Ahmet Iаssaýı atyndaǵy Halyqaralyq qazaq-túrik ýnıversıtetiniń akademıgi, tarıh ǵylymdarynyń doktory Tursun Hazretáli júrgizgen konferensııada negizinen О́zbekáli Jánibekovtiń ómirbaıany, qyzmeti týraly baıandamalar oqylǵan. Al Oraldan barǵan jas ǵalymdar negizinen Alash taqyrybyna, Túrkistan men Batys Qazaqstan óńiriniń baılanysyna toqtalypty. Batys Qazaqstan ınnovasııalyq-tehnologııalyq ýnıversıteti tarıh mamandyǵynyń 2 kýrs stýdenti Perızat Bóltekova «Beket atanyń ómirbaıany men sopylyq qyzmeti» atty baıandama jasasa, 3 kýrs stýdenti Baqytgúl Dııarova «Oral qazaqtarynyń sezinde qarastyrylǵan memlekettik máseleler», 4 kýrs stýdentteri Janar Bahıtjanova - «Alash qaıratkeri Berkinǵalı Atshybaev», Bekzat Almaǵalıev - «Alash qaıratkeri Qaldybaı Asanov» taqyrybyndaǵy zertteýlerin ortaǵa salǵan. Jas ǵalymdardyń tyrnaqaldy eńbekteri baǵalanyp, bárine de arnaıy sertıfıkat tabys etildi.
- Shákirtterimdi stýdent kezinen ǵylymǵa baýlyp, izdenisterin únemi ushtap júremin. Keleshekte ózge de oqý oryndarymen ǵylymı-tájirıbelik baılanysty jalǵastyramyz degen úmittemiz. Mundaı saparlar jas ǵalymdardyń sanasynda máńgi qalady, ǵylymǵa qyzyǵýshylyǵy oıanady. Bul bastamany qoldaǵan oqý orny basshylaryna, jol qarajatyn kótergen ata-analarǵa alǵys aıtamyn deıdi alashtanýshy, tarıh ǵylymdarynyń kandıdaty Dámetken Súleımenova.
Qazbek QUTTYMURATULY
«Egemen Qazaqstan»
Oral qalasy
