Bul kúni Taraz qalasyndaǵy «Balasaǵun» ortalyq konsert zalynda sonaý saqtar zamanynan, Tumar patshaıym dáýirinen beri jalǵasyp kele jatqan ulttyq dástúr nasıhattaldy. Atalǵan ıgi sharany oblystyq mádenıet, arhıvter jáne qujattama basqarmasy uıymdastyrdy.
Bul oraıda oblystyq qazaq drama teatrynyń ártisteri Kórisý kúniniń ulttyq dástúrimizge engenin beıneleıtin qoıylym qoıyp, kópshiliktiń yqylasyna ıe boldy. Osy kúni erler bir-birimen tós qaǵystyryp, aqsaqaldar men aq jaýlyqty ájeler urpaq tárbıesi jóninde ónegeli áńgimeler órbitti. Kópshilik birin-biri jańa jas qosýymen quttyqtap, máre-sáre kúı keshti. Mereke barysynda oblystyq ardagerler keńesiniń tóraǵasy, Jambyl oblysynyń qurmetti azamaty Erkinbek Soltybaev sóz alyp, kópshilikti kelip jetken kóktem merekesimen quttyqtady. Alda kele jatqan Ulystyń uly kúni elimizge beıbitshilik pen tatýlyq ákelsin degen tilegin bildirdi. Sondaı-aq eńbek ardageri Nurmahan Tilegenov Taraz qalasynyń turǵyndary men qonaqtaryna bata berdi.
Aıta keteıik, Naýryz merekesi bıyl áýlıeatalyqtar úshin jańa mazmunǵa ıe bolýda. Olaı deıtinimiz, Jambyl oblysynyń ákimi Asqar Myrzahmetovtiń qaýlysymen 14-22 naýryz aralyǵynda óńirde Naýryz merekesi toılanatyn bolady. Toǵyz kún boıy halyq «Kórisý kúni», «Meıirim kúni», «Taǵzym kúni», «Alas kúni», «Naýryz-shashý», «Yntymaq kúni», «Shattyq kúni», «Úılesim kúni» jáne «Ulys kúni» sııaqty aıtýly kúnderdi atap ótip, ár kúnniń óz ereksheligine saı saltanatty sharalar uıymdastyrylady. Osynaý dýmandy kúni oblystyq fılarmonııa ónerpazdarynyń óneri men óńirdegi etnomádenı birlestikterdiń konserttik baǵdarlamasy da kópshilikke kóktem áserin syılady. Sondaı-aq merekege jınalǵan kópshilik arnaıy tigilgen kıiz úıdiń ishine kirip, naýryz-kójeden jáne tátti baýyrsaqtardan dám tatty.
Hamıt Esaman,
«Egemen Qazaqstan»
Jambyl oblysy
