AQSh-ta BUU jáne Qytaı kınoındýstrııa ókilderiniń qoldaýymen Halyqaralyq WeLink kınofestıvali osymen ekinshi ret ótkizilip otyr. Sharaǵa Qazaqstan jáne AQSh, Qytaı, Ońtústik Koreıa, Sýdan, Taıland, Taıvan, Japonııa elderinen ár túrli janrlarda fılm túsirýshiler bas qosty.
Qazylar alqasy «Anaǵa aparar jol» tarıhı dramasyna (bas prodıýseri - Álııa Nazarbaeva, rejısseri - Aqan Sataev) joǵary baǵasyn berdi. Qazaqstandyq ónim «О́mir jetistikteri» atalymynda eń joǵary marapatty - «Úzdik kórkem fılm» nagradasyn jeńip aldy.
Nıý-Iorkte «Anaǵa aparar jol» kınokartınasyn tamashalaǵan AQSh-taǵy qazaqstandyqtar kóz jasyn jasyra almady.
Aıta keteıik, kartına buǵan deıin de álemdi moıyndatqan bolatyn. Ispanııa, Reseı, Horvatııa kınofestıvaldarynda joǵary nagradalardy jeńip aldy, kóptegen elderde sonda turatyn qazaqstandyqtar úshin áli de qoıylyp jatyr. Kınoda ananyń sheksiz meıirimi, týǵan jerge adaldyq pen súıispenshilik jaıly syr shertiledi. WeLink-tiń maqsaty - búkil álemdegi kınoóndirisshilerdiń basyn qosyp, birlesken halyqaralyq jobalardy iske asyrýǵa jaǵdaı jasaý.
Kınofestıval «Kınomatograftaǵy áıelder» taqyrybyndaǵy forým aıasynda ótti. Oǵan álemniń túkpir-túkpirinen kelgen 100-ge jýyq kınomatografıster, sonyń ishinde belgili qytaılyq rejısser ári Qytaı kınomatografısteri odaǵynyń tóraǵasy Lı Sıankýan da qatysty. Forýmǵa BUU bólim tóraǵasy Ramý Damodaran basshylyq etti.
