2016 jyly jasalǵan saraptamanyń qorytyndysy boıynsha ǵımaratqa kúrdeli jóndeýden ótkizý qajet bolǵan.
Saraptama qorytyndysy negizinde Aral aýdandyq ákimdigi tarapynan qurylǵan komıssııa turǵyndarǵa atalǵan úıdi Turǵyn úı-kommýnaldyq sharýashylyǵyn jańǵyrtý baǵdarlamasy boıynsha (búgingi tańda "О́ńirlerdi damytý -2020" baǵdarlamasy) kúrdeli jóndeýden ótkizý týraly birneshe ret usynǵan. Alaıda, turǵyndar kelisim bermegen.
«Biz túsindirý jumystaryn júrgizdik. Turǵyndardyń 70% kelisimin berse, baǵdarlama boıynsha ǵımaratqa kúrdeli jóndeý júrgiziletinin eskerttik. Osy baǵdarlama aıasynda Aral qalasynda ornalasqan 47 ekiqabatty úıdiń 22 kúrdeli jóndeý júrgizildi. Biraq, bul úıdiń turǵyndary mundaı jumysty júrgizýge kelispedi. Biz nysannyń qaýipti ekenin birneshe márte eskerttik", - dedi Baýyrjan Mahatov.
Sonymen qatar, qazirgi kezde osy ǵımaratta turǵan ár otbasynyń jaǵdaıy jan-jaqty zerttelip, áleýmettik kartalary ázirlenip jatqanyn málimdedi.
"Balabaqsha retinde salynǵan ǵımarat "Aral qanaty-2020" KQK balansynda tur. 90-jyldary turǵyndar munda zańsyz ornalasqan. Osyǵan oraı, áleýmettik karta ázirlenýde. Máselen, mundaǵy 7 páter jalǵa berilip kelgen. Qazirgi kezde ár otbasynyń áleýmettik jaǵdaıy anyqtalýda. Osy karta men komıssııanyń qorytyndysy boıynsha tıisti sharalar atqarylady", - dedi Baýyrjan Mahatov.
Búginde evakýasııalanǵan otbasylar aýdandyq jastar resýrstyq ortalyǵyna jáne týǵan-týysqandarynyń úıine ornalastyryldy.
Esterińizge sala ketsek, 17 naýryz kúni Aral qalasynda ekiqabatty úıdi bólip turǵan bóligi opyrylǵan. Ǵımarat 1986 jyly balabaqsha retinde salynyp, 90-jyldary baspanasy joq turǵyndar úıdi ıemdenip, qonystanyp alǵan. Eki qabatty ǵımarat 20 páterden turady, onyń 15-de ǵana turǵyndar qonystanyp kelgen.
Búgingi tańda, aýdan ákiminiń tapsyrmasymen arnaıy komıssııa quryldy, tekserý júrgiziledi.
