– Úlken joldyń bastaýynda turmyz. Bul jol biz úshin aýyr jáne uzaq. Joldastyq kezdesý bolsa da aldaǵy oıyndardyń jaýapkershiligi joǵary. Qos komanda da bizden myqty. Jaqsy tájirıbe bolady. Ulttyq quramany jańa deńgeıge kóterýimiz kerek. El birinshiliginiń birneshe oıynyn kórdim. Ashyǵyn aıtsam, fýtbolshylardyń deńgeıine kóńilim tolmaıdy. О́te tómen. Joldastyq kezdesýlerge negizgi 3 oıynshymyz jaraqatyna baılanysty qatysa almaıdy. Logvınenko, Jýkov, Lýnın. Ulttar lıgasy aıasyndaǵy oıyndarǵa bar kúshimizdi salýymyz qajet. Biz favorıt emespiz. Tek toptan shyǵýǵa umtylamyz. Favorıtter barlyq ýaqytta jeńiske jete bermeıdi. Sondyqtan bar kúsh-jigerimizdi salamyz. Talap qoıa bilýimiz kerek. Tártip pen talap bolsa, nátıje keledi. Kásibı deńgeıimizdi arttyrý maqsatynda aıanbaýymyz kerek. Menen kúni erteń nátıje kútpeńder, ol ózi ýaqytymen keledi.
– Mokınniń jasy 37-ge keldi. Onyń quramaǵa shaqyrtylýy qanshalyqty oryndy?
– Jasyna qaramaımyn. Mokın myqty, tájirbıeli qaqpashy. Maǵan talabymdy oryndaı alatyn qaqpashylar kerek.
– Nege joldastyq kezdesýlerge Bolgarııa men Vengrııa tańdaldy?
– Utylýymyz da múmkin. Eń bastysy, durys qorytyndy shyǵaryp, alǵa qadam basýymyz mańyzdy. Bizde joldastyq kezdesýler uıymdastyrýda kemshilikter bar. Basqa komandalarmen oınaýǵa da bolýshy edi. Myqty komandalarmen oınaý arqyly sheberligimizdi shyńdaı túsemiz.
– Osyǵan deıin ulttyq quramada ózgerister bolýy múmkin degen bolatynsyz...
– О́zgeris bolmaıdy. Tizimde bar oıynshylarǵa senim artamyz. Jas oıynshylar bar. Seıdahmet, Zaınýtdınov sııaqty jastarǵa múmkindik beriledi.
– Kapıtan kim bolady?
– Daýysqa salynbaıdy. Kapıtan kim bolatynyna baılanysty sheshimdi ózim qabyldaımyn. Eki oıynda ártúrli kapıtandar bolýy da yqtımal.
– Baýyrjan Islamhan quramanyń kóshbasshysy bola ala ma?
– Ol óte myqty oıynshy. Qorǵaýshylyq jaǵyna kóp mán berý kerek. Baýyrjanǵa sol ǵana jetispeıdi. Sapaly oıynshy bola alady. Biz kómektesemiz.
– Negizgi shabýylshylar kimder?
– Shetkın, Hıjnıchenko, Murtazaev. Shabýylshylar emes, ortalyq qorǵaýshy pozısııasy problema bolyp tur. Logvınenko oıynǵa qatysa almaıdy. Ol negizgi ortalyq qorǵaýshymyz bolatyn.
«Ulttyq quramany jankúıerlerdiń, jýrnalısterdiń qoldaýy mańyzdy. Biz barlyǵymyz jumys jasaýymyz kerek. Sonda ǵana nátıje bolady. Uzaq jol kútip turǵanyn aıttym. Sol joldan abyroımen ótýge barlyǵymyz jumys jasaıyq. Ulttar lıgasynda toptan birinshi bolyp shyǵýǵa tyrysamyz. Bizdiń qarsylastarymyz da myqty. Degenmen, óz oıynshylarymnan eýropalyq oıyn kútemin. «Astana», «Qaırat» komandasynan shaqyrtylǵan, tájirbıeli oıynshylar eýropalyq fýtboldy kórdi. Kúzde tolyq daıyn bolýymyz kerek», – dep qorytyndylady Stanımır Stoılov baspasóz jıynyn.
Erkebulan JOMART,
«Egemen Qazaqstan»
