Jeke ınvestordyń fýtbol-jattyǵý keshininiń jasaqtalýyna qosqan qarajaty 300 mıllıon teńgeden asyp túsedi. Munda ár kún saıyn 500 ke tarta bala sporttyń jeńil atletıka túrlerimen shuǵyldana alady. Osy arqyly óńirde birinshi kezekte balalar men jasóspirimderdiń fýtbolmen emin-erkin shuǵyldanýyna barlyq qolaıly jaǵdaılar men múmkindikter týǵyzylǵan. Oǵan oblystyń ár túpkirinen fýtboldaǵy daryndy balalardy iriktep tartý úshin qajetti alǵysharttar jasalý ústinde. Olardyń arasynan keleshekte atalǵan sport túriniń kánigi sheberleri shyǵatynyna senim mol.
Taǵy bir aıta keterlik másele budan eki jyl buryn oblystyń barlyq aýdandarynda «Aqtóbe» fýtbol klýbynyń bólimsheleri ashylǵan bolatyn. Endigi kezekte osy klýbtarda ózin jaqsy qyrynan kórsete bilgen jasóspirimder óz sheberlikterin jańa keshende shyńdaı alady. Bul úshin munda bes fýtbol alańy paıdalanýǵa berilgen. Bul jóninde jeke ınvestor Asqarbek Mamyrbaev «Egemen.kz» tilshisine óz oı-pikirin bylaısha jetkizdi.
Keshendegi fýtbol alańdary FIFA-nyń barlyq halyqaralyq standarttaryna sáıkes keledi. Mundaı jalpy aýmaǵy segiz myń metrlik jabyq fýtbol kesheniniń elimizde eshqandaı balamasy joq. Mundaǵy jaraqat alý qaýpin azaıtatyn jaıylma jastyqtar men sport parketinen jasalǵan jabyndylar da onyń zamanaýı kelbetin tolyqtyra túsedi. Ári alańdardyń bári de jasandy kógaldan jasalǵan tósemdermen kómkerilgen.
Buǵan qosarymyz Aqtóbede ashylǵan fýtbol-jattyǵý kesheni keleshekte tek biryńǵaı fýtbolǵa beıimi bar jetkinshekterdi jattyqtyryp qana qoımaı buǵan qosa respýblıkalyq jáne halyqaralyq deńgeıdegi jarystar ótkizý ortalyǵyna da aınalmaq. Sóz sońynda budan eki jyl buryn oblysta fýtbolmen aınalysatyn segiz myńǵa jýyq bala bolsa, búginde olardyń sany on eki myńnan asyp túskenin aıta ketkimiz keledi. О́ńirde ashylǵan 32 fýtbol alańy sporttaǵy daryndy jetkinshekterdiń sporttyń osy túrin kásibı turǵydan ıgerýine tıisti múmkindikter beredi.
Temir Qusaıyn,
"Egemen Qazaqstan"
Aqtóbe
