Jyr dodasyn Respýblıka jyrshy-termeshiler odaǵynyń tóraǵasy, Qazaqstannyń eńbek sińirgen qaıratkeri, dástúrli muramyzdyń janashyry Júrsin Ermannyń júrgizdi. Qazylar alqasyna «Juldyz» jýrnalynyń bas redaktory Ǵalym Jaılybaı jetekshilik etti.
Aıtys shymyldyǵyn birinshi bolyp almatylyq Qazyret Berdihan men shymkenttik Qalıjan Bildásh ashty. Ekeýi de á degennen alymdy da shalymdy aqyndar ekenin tanytyp, oralymdy jyr shýmaqtaryn tógildirdi . Sahnaǵa ekinshi \bolyp kóterilgen Rınat Zaıytov pen Birjan Baıtýov qoǵamda oryn alǵan nebir túıtkilder men keleńsiz jaıttardy aıaýsyz túıreýimen, utymdy ýáj aıtýlarymen erekshelendi. Semeılik Serik Qýanǵanmen jup quraǵan petropavldyq Muhammed Qońqaev óz babynda ekenin tanytyp, kórermenderdi bir serpiltip tastady.
Qaraǵandylyq Maqsat Aqanov pen semeılik Ásem Erejeqyzy arasyndaǵy tartys quda men qudashanyń qaljyńy retinde órbidi. Oraldyq Jansaıa Mýsına men soltústikqazaqstandyq Jarqyn Juparhan qyz ben jigit aıtysynyń ádemi úlgisin kórsetti.
Elimizdiń ár túkpirinen jınalǵan 16 aqynnyń eshqısysy júldesiz qalmady. Qazylar alqasynyń sheshimimen 6 aqynǵa shabyttandyrý syılyqtary tabys etildi. Qazyret Berdihan, Ásel Erejeqyzy, Bolatbek Orazbaevqa /3-shi oryn/– 300 myń, Jansaıa Mýsına, Jarqyn Juparhan /2-shi oryn/–500 myń, Maqsat Aqanov /1-shi oryn/–1 mıllıon teńgeni ıelendi. Bas báıgege tigilgen sheteldik jeńil kólikti Rınat Zaıytov utyp aldy. T. Kákishev, M. Jumabaev, Erik Asqarov atyndaǵy arnaıy syılyqtaryn «aıtystyń aqtańgeri» Aıbek Qalıev, Muhammed Qońqaev, Qalıjan Bildásh enshiledi.
О́mir Esqalı,
«Egemen Qazaqstan».
Soltústik Qazaqstan oblysy
