Tálimi mol alqaly basqosýdy Qazaqstan Respýblıkasynyń eńbek sińirgen qaıratkeri Dáýletkereı Kápuly júrgizip otyrdy. Jıynda Parlament Májilisiniń depýtaty Abaı Tasbolatov, Qazaqstan kompozıtorlar odaǵynyń tóraıymy Balnur Qydyrbek, belgili sazger Jolaman Tursynbaev, fılologııa ǵylymdarynyń doktorlary Kúlásh Ahmet, Serik Negımov, halyqaralyq manasshylar konkýrsynyń jeńimpazy Baıanǵalı Álimjanov, tanymal ánshi Serik Ospanov taǵy basqa sheshender sal-serilerdiń serkesiniń ómiri men shyǵarmashylyǵyn, Arqada aty shyqqan dúldúl ónerpazdar ishinde alar ornynyń aıshyqtyǵyn jan-jaqty saralap berdi.
Konferensııada Dáýletkereı «Segiz seri baıyp batqan kúndeı shapaǵy áli kúnge el-jurtynyń júregine nuryn quıyp turǵany aıdaı álemge aıqyn. Árıne, Segiz serini aspandatyp jiberemiz dep jerbaýyrlatyp alǵan keıbir avtorlarymyz da boldy. Endigi kezekte atyn ulyqtaımyz dep tyrtyq qyla jazdaǵanymyzdy eskerip, bir adamnyń boıyna shaq ónerin, tamasha qoltańbaly ánderin ǵana nasıhattap, barymen bazarlaı bileıik» dep aǵynan jarylsa, B. Álimjanov Segiz Seri murasy dep júrgen dúnıelerdiń arasynda qospalary az emesine naqty mysaldar keltirip, ondaı kúshtep tańýdan arylý qajettigin eskertti. Onsyz da óshpes muralary jetkilikti. Asyldy eshqashan tot baspaıdy, dedi.
«Babamyz «Bozqaraǵan» degen óleńinde «Men týdym Qojabergen aýylynda, Ný orman «Tolybaı jaly» baýyrynda. Jazyqsyz qýǵyndalyp, qashqyn boldyq, Jolyǵyp zamananyń daýylyna» dep jyrlaǵan. Týǵan jeri– áıgili «Elim-aı dastanynyń avtory Qojabergen jyraý Tolybaısynshynyń balasynyń aýyly. Kereıdiń ishinde Ashamaıly, Kóshebeden taraıdy. Segiz Seriniń uly Mustafadan meniń ákem Begen týǵan. Ǵıbratty ǵumyry kóp jyldar boıy kómeski tartyp, kóleńkede qalyp keldi. 30-ǵa jýyq án, 4 dastan, 5-6 kúı shyǵarǵan. Birazy halyq shyǵarmalary na telinip ketken. Urpaqtary qazir Jambyl aýdanynda turady», dedi shóberesi Amantaı Begenov. Urpaqtary atynan taǵylymdy konferensııany uıymdastyrýshylarǵa aq alǵysyn arnady. Basqa da sóıleýshiler óz paıymdarymen bólisip, mazmundy baıandamalar jasady.
S.Ospanov sal-seriler serkesiniń «Gaýhartas», «Ǵaını» ánderin áýelete shyrqap, jınalǵandardyń kóńilin bir kóterip tastady.
О́mir Esqalı,
«Egemen Qazaqstan»
Soltústik Qazaqstan oblysy.
