Foto: Dıana Bagısheva
Qazir oqýshylar men mektep janyndaǵy daıyndyq bóliminiń kishkentaılary da Naýryz meıramyn qarsy alýǵa qyzý daıyndalýda. Kitaphanashylar «Baq – berekem, Qut – merekem-Áz Naýryz!» atty kitap kórmesin tamashalaýǵa shaqyrdy. Kórmede «Qazaq dastarhanynyń dástúri», «Bata berý», «Naýryz», «Qazaq halqynyń salt-dástúri» atty jáne basqa da kitaptar usynylǵan.
Qazaq tili men ádebıeti pániniń muǵalimi Gúlmıra Jaqypovanyń aıtýynsha, Naýryz meıramyna arnalǵan kitap kórmesinde oqýshylar Áz-Naýryz, qut, baq-bereke degen sózderdiń mán-maǵynasyn bilip, tanymdyq sabaqqa qatysty. Bir-birin Naýryzda aıtylatyn «Aq mol bolsyn!» «Ulys oń bolsyn!» quttyqtaýlarmen quttyqtady. Mektepte bilim alyp júrgen ózge ult ókilderiniń de ul-qyzdary ózderiniń qazaq tilinde biletin maqal-mátelderin aıtyp, salt-dástúrlerdi, mýzykalyq mádenıetti, Naýryz kójeniń qalaı ázirlenetini jaıly jarysa aıtyp berdi. «Naýryz aıy týǵanda, toı bolýshy edi bul mańda...» dep Mılana Sýmına Muqaǵalı aqynnyń birneshe óleńin oqyp berdi. Kitaphanadaǵy «О́lke tarıhy” bólimi boıynsha, «Qazaq halqynyń rýhanı mádenıeti» taqyrybyna oraı áńgimeni Maıra mýzeıiniń meńgerýshisi Erlan Oljaıuly júrgizdi. Qazaqtyń mýzykalyq aspaptar jaıly aıtyp, ózimen birge alyp kelgen birneshe aspapta oınap berdi.
Oqýshylar asyǵa kútip júrgen qýanyshty sát bar. Ol – mektepte ótken «Balalardyń 100 áni» atty án baıqaýynyń qorytyndysy –22 kúni – Naýryz meıramynda belgili bolyp, jeńimpazdar da anyqtalady.
Farıda BYQAI,
«Egemen Qazaqstan»
