Naýryz aıynyń 17-si men 21-i aralyǵynda «Kerýen» saýda oıyn-saýyq ortalyǵynda jumys isteıtin kórme odan ári arnaıy baǵyt boıynsha elimizdiń ózge oblystaryna kósh túzeıdi. Respýblıkanyń basty qalalaryndaǵy tanystyrylý jumysy aıaqtalǵan soń fotosýretter Astana kúni qarsańynda bastapqy ornyna qaıta jaıǵastyrylady dep josparlanýda.
«Shyn máninde, Qazaqstannyń árbir jetistiginiń artynda alýan túrli taǵdyrlar tur. Qazirgi medıamádenıetti sýyryla sóıleıtin sheshender emes, ómirdiń ózinen alynǵan shynaıy oqıǵalar qalyptastyrady. Mundaı oqıǵalardy kórsetý buqaralyq aqparat quraldarynyń basty nysanasyna aınalýǵa tıis» dep Elbasy atap ótkendeı, kórmede negizinen «100 jańa esim» jobasy jeńimpazdarynyń fotosýretteri, olardyń atqarǵan jumysy men jetistikteri jaıynda qysqasha maǵlumat beriledi. Osy arqyly joba uıymdastyrýshylary Qazaqstannyń damýyna eleýli úles qosqan, biraq halyqqa tanylmaǵan jańa esimder men olardyń jemisti ómirbaıanyn kópshilikke tanystyrýdy maqsat etip otyr. Onyń arasynda elimizdiń týyn bıikke kótergen sportshylar men aq halatty dárigerler, mesenattyqpen kózge túsken beldi kásipkerler, sondaı-aq ǵalymdar, mádenıet pen qoǵamdyq salada el aýzynda júrgen azamattar bar. Iаǵnı «Elimizdiń jańa esimderi» atty fotokórmeniń mazmunyn negizinen osy «100 jańa esim» jobasynyń jeńimpazdary quraıdy.
«Qazaqstandaǵy 100 jańa esim» 2017 jyly Elbasy Nursultan Nazarbaevtyń bastamasy boıynsha halyqqa keńinen tanylmaǵan, biraq belgili bir salada eleýli jetistikterge jetip, memleketimizdiń damýyna aýqymdy úles qosqan azamattardy taýyp, olardyń úlgi bolarlyq jumysyn dáripteý maqsatynda júzege asyrylǵan bolatyn. Báıgege elimizdiń túkpir-túkpirinen túrli mamandyq ıeleri qatysyp, eń myqty degen 100 adam ashyq onlaın daýys berý arqyly iriktelip alyndy.
Nazerke JUMABAI,
«Egemen Qazaqstan»
Sýretti túsirgen
Orynbaı BALMURAT,
«Egemen Qazaqstan»
