Sondaı-aq Qazaqstan Prezıdenti «EKSPO» kórme kesheni aýmaǵynda ornalasqan etnoaýyldy aralap kórdi. Munda mýzykamen árlengen teatrlandyrylǵan kórinister qoıylyp, dekoratıvti-qoldanbaly shyǵarmashylyq kórme jáne ulttyq sport saıystary uıymdastyryldy.
Memleket basshysy buqaralyq aqparat quraldary ókilderi aldynda sóz sóıledi. Nursultan Nazarbaev barsha qazaqstandyqtardy Naýryz merekesimen quttyqtap, bul meıram urpaqtar sabaqtastyǵynyń jáne halqymyzdyń tereńnen tamyr tartatyn salt-dástúri men mádenıetiniń sımvolyna aınalǵanyn aıtty.
– Naýryz shynaıy jalpyhalyqtyq merekege, árbir azamatymyzdyń búkil Qazaqstannyń damýy men órkendeýine zor úles qosyp otyrǵanyn kórsetetin el birliginiń jarqyn úlgisine aınaldy, – dedi Nursultan Nazarbaev.
Qazaqstan Prezıdenti jalpyǵa ortaq jańarý men rýhanı jańǵyrýdy tanytatyn bul qasterli merekeniń ónegelik mańyzy zor ekenin erekshe atap ótti.
– Ejelden bul meıram adamdardy bereke-birlikke bastap, olardy jaqsylyq pen meıirimdilikke, mahabbat pen shattyqqa bólep keledi. Bul kúnderi biz bir-birimizge qoldaý kórsetip, ókpe-renishimizdi keshiremiz, úılesimdilik pen birlikke umtylamyz. Elimizdiń jahandyq básekege qabilettiliginiń berik negizin qalyptastyryp, ózara qurmet pen kelisim qundylyqtaryn nyǵaıtý bárimiz úshin asa mańyzdy, – dedi Elbasy.
Memleket basshysy Qazaqstannyń táýelsizdik jyldarynda basty barlyq baǵyttar boıynsha zor nátıjelerge qol jetkizgenine erekshe nazar aýdaryp, búginde elimiz odan da órshil maqsatty – álemniń ozyq damyǵan otyz eliniń qataryna qosylýdy kózdep otyrǵanyn atap ótti.
– О́mirimizdiń barlyq salasyn tereń jańǵyrtý – osy zamannyń syn-tegeýrinderine qarsy bizdiń naqty is-qımylymyz. Álemdegi jańa tehnologııalyq revolıýsııa jaǵdaıynda adam kapıtaly, sonyń ishinde azamattarymyzdyń bilimi, qabiletteri men patrıotızmi elimizdiń basty baılyǵy bolyp sanalady. Aqyldy, tabysty jáne ózine senimdi azamattary bar ult qana myqty ári órkendegen Qazaqstandy damyta alady, – dedi Nursultan Nazarbaev.
Memleket basshysy árbir azamatymyzǵa jańa múmkindik beretin «Bes áleýmettik bastamany» iske asyrý máselesine erekshe toqtaldy.
– «7-20-25» atty jańa ıpotekalyq baǵdarlamanyń arqasynda elimizdiń barlyq óńirindegi kóptegen otbasy baspanaly bola alady. Jeńildetilgen shaǵyn nesıeniń berilýi óz kásibin bastaımyn degenderdiń qataryn kóbeıtedi. Qosymsha 20 myń grant bólip, jańa jataqhanalar salý arqyly myńdaǵan jastarymyzǵa jańa múmkindikter usynylady. Osy aıtylǵan naqty sharalar – jastar men jas otbasylardy qoldaýdyń kórinisi. Sol arqyly halyqtyń ómir súrý sapasyn jaqsartýǵa jáne elimizdiń ál-aýqatyn arttyrýǵa tyń serpin beriledi, – dedi Nursultan Nazarbaev.
Sońynda Elbasy Otanymyz – Qazaqstan Respýblıkasynyń órkendeýi jolynda barsha jurtqa baqyt, bereke-birlik pen tolaǵaı tabys tiledi.
