Mártebeli qonaqtar, zııaly qaýym ókilderi aldymen sol jıyn ótetin mańdaǵy Aqbýra áýlıeniń kesenesine jınalyp, oblys ákimi Janseıit Túımebaev «Kemeqalǵan» týrıstik kesheniniń jobasymen tanystyrdy. Joba boıynsha Qazyǵurttyń Kemeqalǵan bıigine qaraı 3,1 shaqyrymdyq qanat joly men 4 shaqyrymdyq jaıaý júrginshiler joly salynbaq. Bıikte uzyndyǵy 137 metrlik, eni 30 metrlik, bıiktigi 15 metrlik keme tárizdi ǵımarat boı kóteredi.
Úsh qabatty nysannyń ishinde murajaı, qonaq úı, meıramhana, kórý alańdary bolady. Sondaı-aq osy keshen aýmaǵynan ulttyq at sporty oıyndaryn ótkizetin 20 gektarlyq alań salý josparlanǵan. Oblys basshysy keler urpaqqa arnap jazylyp, arnaıy kapsýlaǵa salynǵan hatty keshenniń irgetasyna qalap jiberdi jáne osy aıtýly oqıǵaǵa oraı qoıylǵan eskertkishtastyń jamylǵysyn ashty.
«Tirshiliktiń bastaýy Qazyǵurt» qoıylymymen shymyldyǵy túrilgen shara barysynda 230 bıshi horeografııalyq kompozısııa arqyly jer jahandy topan sý basyp, Nuq paıǵambardyń kemesiniń Qazyǵurt taýyna aıaldaǵanyn beıneli bımen pash etti. Oblys ákimi J.Túımebaev Naýryzdy toılaýdyń ne sebepti Qazyǵurt taýynan bastaý alǵanyna toqtaldy. Ańyz boıynsha Nuq paıǵambardyń kemesi Qazyǵurt taýyna Naýryzda kelip toqtaǵan. Kemeden birinshi bolyp shyqqan tirshilik ıesi náýirzek bolǵan. Alǵash ret jerge qyltıyp shyqqan ósimdik kókbáısheshek, uzaq joldan aryp-arshyp kelgen kemedegi bar azyq-túlikten daıyndalǵan alǵashqy taǵam Naýryzkóje eken. Iаǵnı, Qazyǵurt pen Naýryz ekeýiniń bir-birimen baılanysatyn tustary kóp.
-Naýryzda dástúr boıynsha jastar úlkendermen kórisedi. О́kpe-naz renishter umytylady. Iаǵnı, Naýryz yntymaq pen birlik, úlkenge qurmet, meıirim men keshirimdilik sekildi izgi qasıetter dáripteletin mereke,-dedi oblys basshysy.
Toı oblys ónerpazdarynyń konserttik baǵdarlamasy men ulttyq sport túrlerinen uıymdastyrylǵan jarystarmen jalǵasty. Bıyl ońtústikte qolǵa alynatyn aýqymdy mádenı sharalar da osy jıynda aıtyldy. Atap aıtqanda, «Ulttyq qolóner – uly mura», «Týǵan jerge taǵzym: Ordabasy kóktemi» jastar forýmy,«Aqsý-Jabaǵylynyń alaýy, Shubaıqyzyldyń jalaýy» qyzǵaldaq festıvali, «Qymyzmuryndyq», «Qaýynfest», «Safarı Shardara» jáne taǵy basqa da is-sharalar ótkizý josparlanýda.
Ǵalymjan Elshibaı,
«Egemen Qazaqstan»
