Áıgili sheberler zergerlik, keste tigý óneri, aǵashty oıý, temirdi kórkemdep óńdeý, dástúrli toqymashylyq, qamshy órý jáne t.b. qolóner buıymdaryn usyndy. Merekelik is-sharaǵa shyǵarmashylyq ujymdar, bı toptary men belgili oryndaýshylar jumyldyrylǵan. Qonaqtar ystyq baýyrsaq pen naýryz kójeden dám tatýda.
Naýryz meıramy erteń, 22 naýryz kúni saǵat 10.00-de jalǵasyn tappaq. EKSPO týrıstik aımaǵynyń nysandary bolsa, qarańǵy túskenshe jumys isteıdi. Meıramǵa kelgen qonaqtar «Nur Álem» - «Bolashaq energııasy» murajaıy men Úzdik tájirıbeler aımaǵyn saǵat 21.00-ge, EKSPO muz aıdynyn 23.00-ge deıin tamashalaı alady.
Budan bólek, EKSPO-2017 aýmaǵynda kelýshilerdiń jaılylyǵy úshin 1000 avtooryndyq jerasty turaǵy qarastyrylǵan. Turaq táýlik boıy jumys isteıdi, oǵan kirý/shyǵý T. Rysqulov kóshesi jaǵynan (ońtústik kirý toby) júzege asyrylady.
Kórme aıaqtalǵannan keıin týrıstik aımaqtaǵy EKSPO-2017 murasynyń eń mańyzdy nysany, sózsiz, «Nur Álem» pavılon-murajaıy bolyp tabylady. Ol 2017 jylǵy qarashada erekshe qorǵalatyn memlekettik sáýlet nysany bolyp tanyldy.
Sondaı-aq, «Nur Álem» sheteldik BAQ-ta elordamyzdyń jańa sımvoly Astananyń eń jıi eskeriletin týrıstik nysany qatarynda.
Úzdik tájirıbeler aımaǵy – EKSPO-2017 sımvolıkalyq ortalyǵy. Onda eń úzdik tehnologııalar, jobalar men ártúrli energetıka salasyndaǵy strategııalar usynylǵan. Onda ónerkásipte, elektrqýatyn saqtaý men qoldaný, klımattyń ózgerýimen kúres nemese damýshy elderde elektrenergııasymen qamtamasyz etý joldary qarastyrylǵan.
Kórme kesheniniń mańynda Kongress-ortalyǵy ornalasqan. Kongress-ortalyǵynda aýqymdy mádenı oıyn-saýyq sharalar, taqyryptyq forýmdar men konsertter ótkizýge barlyq múmkindikter qarastyrylǵan.
Energııa holy - kameralyq konsertter, óner toptarynyń qoıylymdary úshin joǵarytehnologııalyq dybystyq qurylǵylarymen jabdyqtalǵan, kópfýnksııaly sahna alańy.
