Atyraý qalasynda 15-naýryz kúni bastalǵan jaratylystaný-matematıka baǵyty boıynsha 20 - respýblıkalyq olımpıada aıaqtaldy. Olımpıada qorytyndysy boıynsha 67 oqýshy 1 dárejeli altyn, 104 oqýshy 2 dárejeli kúmis jáne 177 oqýshy 3 dárejeli qola medaldarmen marapattaldy.
Jalpy saıys qorytyndysy boıynsha «Eń úzdik olımpıada komandasy-2018» nomınasııasy boıynsha 1-oryn Atyraý, Pavlodar, Astana, Nazarbaev zııatkerlik mektepteriniń komandalaryna, 2-oryn Aqtóbe, Almaty, Qaraǵandy, Mańǵystaý komandalaryna, 3-oryn Qyzylorda, Batys Qazaqstan komandalaryna buıyrdy. Sonymen qatar, «Olımpıadanyń eń jas qatysýshysy», «Eń úzdik aýyl oqýshysy», «Eń úzdik aýyl muǵalimi» jáne «Eń úzdik olımpıadalyq mektep» nomınasııalary boıynsha jeńimpazdar anyqtaldy. Olımpıadanyń jabylý saltanatyna oblys ákimi Nurlan Noǵaev arnaıy qatysyp, júldeli oryndardy tabystady.
- Elbasymyz jastarǵa úlken senim artady, álemdegi jahandaný prosesinde bolyp jatqan keleńsiz jaǵdaılarǵa tótep beretindeı bilimdi, tárbıeli, ishki rýhy bıik azamattardy tárbıeleý jóninde is-sharalardy júzege asyrýdy ortalyq memlekettik jáne jergilikti atqarýshy bılik ókilderine tapsyryp otyrady. Elimizdi alǵa qaraı damytatyn sizder,osy baǵyttan taımańyzdar. Joldaryńyz aq bolyp, ózderińiz qoıǵan mejege jetýlerińizge, sizderge senim artqan azamattardyń úmitteriniń aqtalýyna tilektespin,-dedi oblys basshysy.
Aıta keteıik, olımpıadaǵa elimizdiń 14 oblysynan, Astana, Almaty qalalarynan, respýblıkalyq bilim berý uıymdarynan jáne Nazarbaev zııatkerlik mektebinen 19 komanda qatysty. Atyraý oblysy boıynsha 53 oqýshy qatysyp, 21-i júldeli oryndar aldy. Olımpıadadan tys ýaqytta oqýshylar qaladaǵy bilim ordalarymen, mádenı-tarıhı oryndarmen tanysyp, psıhologııalyq trenıngter men sporttyq sharalarǵa qatysty.
