Juldyzdy qalashyqta Qazaqstan Respýblıkasy, Reseı Federasııasy jáne Birikken Arab Ámirlikteriniń delegasııalary kezdesip, ǵarysh salasyndaǵy áriptestik máselelerin talqylady.
Kelissóz qorytyndysymen «Roskosmos» agenttiginiń bas dırektory Igor Komarov, QR qorǵanys jáne aeroǵarysh ónerkásibiniń mınıstri Beıbit Atamqulov jáne BAÁ ǵarysh agenttigi dırektorlar keńesiniń tóraǵasy Ahmad Belhýl Al-Falası ǵarysh salasyndaǵy úsh jaqty áriptestikti keńeıtý jóninde hattamaǵa qol qoıdy. Taraptar 2018 j. sáýir aıynda ǵarysh aılaǵyndaǵy áleýeti jobalardyń mán-jaıyn naqtylaý úshin birlesken jumys tobyn qurý týraly kelisti.
«2017 jyldyń aıaǵynda «Baıqońyr» keshenin damytý jónindegi birlesken tujyrymdamaǵa qol qoıyldy. Osy tujyrymdama aıasynda ǵarysh aılaǵyna syrtqy ınvestısııa tartý máselesi sheshildi. Birikken Arab Ámirlikteri jobaǵa qatysýǵa qyzyǵýshylyq tanytty. Arnaıy jumys toby qurylyp, úshjaqty kelisimge qol qoıyldy. Joba aıasynda 1961 jyly qosylǵan «Gagarın starty» alańy qaıta jańǵyrtylyp, «Soıýz-2» zymyran tasyǵyshtar shyǵarylatyn bolady. Ári qaraı munda ǵarysh salasy ǵana emes, basqa da salalardy damytyp, máselen, tehnoparkty salamyz. Iаǵnı, Baıqońyr kesheniniń bolashaǵy jarqyn dep oılaımyz», - dedi Qyzylorda oblysy ákiminiń orynbasary, «Baıqońyr» keshenindegi QR Prezıdentiniń ókili Serik Qojanııazov.
QR qorǵanys jáne aeroǵarysh ónerkásibi mınıstriniń keńesshisi Meıirbek Moldabaevtyń aıtýynsha, «Baıqońyr» kesheninde birlesken jobalardy júzege asyrý aıasynda ǵarysh aılaǵynyń damýyna jańa serpin beriledi.
«Roskosmospen birge 2050 jylǵa deıin birlesken tujyrymdamany ázirlep, bıýdjettik qarjyǵa qarap qalmaı, syrttan ınvestor tartý týraly kelistik. Mine, endi Birikken Arab Ámirlikteri usynylǵan kommersııalyq ushyrylymdardy uıymdastyrý maqsatynda start alańqaıy men zymyran-tasyǵyshty jańǵyrtý jobasyna qyzyǵýshylyq bildirdi», - dep atap ótti Meıirbek Moldabekov.
Esterińizge sala keteıik, 21 naýryz kúni saǵ. 23:44-te BAÁ men Qazaqstan Respýblıkasynyń delegasııalary «Soıýz MS-08» ǵarysh kemesiniń «Baıqońyr» ǵarysh aılaǵyndaǵy № 1 alańynan ushyrylýyn tamashalady.
