Oblys ortalyǵyndaǵy merekelik baǵdarlamany ashyp, aımaq turǵyndaryn quttyqtaǵan Almaty oblysynyń ákimi Amandyq Batalov jetisýdyń dańqty uly, ǵaryshker Aıdyn Aıymbetovke oblystyń Qurmetti azamaty ataǵyn tabystady.
Batyr jerlesimiz ataq-abyroıdan, marapattan kende emes. Biraq, bul ataqtyń oryny bólek. Jetisý jurtynyń ǵaryshkerge degen qurmeti. El aldyndaǵy paryzyn abyroımen oryndaǵan, otanymyzdyń gúldenýine eńbek etip júrgen azamatqa aıtylǵan týǵan eldiń rızashylyǵy, - dedi oblys basshysy.
Merekege jınalǵan jurt Naýryz kójeden dám tatyp, óner sheberleriniń konsertin tamashalady. Búgin Taldyqorǵanda kún raıy da shýaq shashyp, synap baǵanasy 22 gradýs ystyqty kórsetti.
Sondaı-aq, Ulystyń uly kúni qarsańynda Tekeli qalasynda 80 páterlik turǵyn úı paıdalanýǵa berilip, uzaq jyl baspana kezegin kútken adamdar jańa qonysqa kóshti.
Qalmahanbet Muqametqalı,
«Egemen Qazaqstan».
Almaty oblysy
