Merekelik sharalar tańerteńgi saǵat 10-da bastaldy. Merekeniń bas ordasy bolǵan Sultan Beıbarys alańynda eki kún boıy 23 kıiz úı tigilip, negizgi konserttik baǵdarlamadan bólek teatrlandyrylǵan qoıylym kópshilik nazaryna usynyldy. Ár kıiz úıdiń aldynda ulttyq oıyndar oınalyp, sporttyq jarystarda júldegerler anyqtaldy. Ártister óner kórsetti, jármeńkeler ótti. Aqshańqan aǵash úılerdi óńirdegi sheteldik kompanııalar, memlekettik jáne jeke mekemeler, qoǵamdyq uıymdar da qurdy.
Merekelik sharada oblys ákimi Nurlan Noǵaev quttyqtaý tilegin aıtty.
-Naýryz – babalarymyzdan mura bop qalǵan meıram, bul kúni tabıǵattyń ózi jandanyp, tirshilik túleıdi, adamdardyń júrekteri meıirim men jylylyqqa tolady. Búgin barlyq qazaqstandyqtar ultyna, dinine qaramastan, Naýryz meıramyn toılaıdy,-dedi Nurlan Noǵaev. -Búgin-aq tilekter aqtarylatyn kún. Memleket basshysy aıtqandaı, Qazaqstan táýelsizdik jyldarynda qoǵamnyń qaı salasynda bolmasyn iri tabystarǵa qol jetkizdi. Bul jetistikke árqaısymyzdyń qosqan úlesimiz bar, óıtkeni birligi berik, óz kúsh-qaıratyna senimdi jandar ǵana ósip-órkendegen Qazaqstandy qurýǵa qabiletti.
Shara barysynda eń ádemi kıiz úı anyqtaldy. Birinshi oryn júldegerine 300 000 teńge, ekinshi orynǵa 200 000, úshinshi orynǵa 100 myń teńge tabystaldy. «Eń dámdi naýryz kóje», «Úzdik teatrlandyrylǵan qoıylym» atalymdary boıynsha da baıqaý júldegerleri baǵaly syılyqtarǵa ıe boldy.
Kıiz úılerde jyljymaly asúı ornatyldy, halyqqa baýyrsaq, palaý men naýryz kóje usynyldy.
Bas alańnan bólek qaladaǵy 10 alańda bir ýaqytta mereke toılandy. «Saraıshyq» kommýnaldyq bazary mańynda «Naýryz-jańa kún» atty konserttik baǵdarlama, «Olımpıadalyq rezerv» ortalyǵy ǵımaraty aldynda “Naýryz-bereke bastaýy” konserti ótti. «Saraıshyq» kommýnaldyq bazary basshylyǵy, turǵyn úı kommýnaldyq sharýashylyǵy, qala mektepteri ulystyń uly kúniniń joǵary deńgeıde atalyp ótýine úles qosty. Arnaıy ornatylǵan kıiz úılerde tegin baýyrsaqtar men ulttyq taǵamdar taratyldy. Ulttyq sporttyq oıyn túrlerinen jarystar uıymdastyryldy.
Qalada mereke keshke deıin toılanady. 19.00-de Sultan Beıbarys alańynda merekelik konsert bastalady. Naýryz meıramyna arnalǵan sharalar saǵat 23.00-de ǵajaıyp otshashýmen qortyndylanady.
