Alańǵa kıiz úıler tigilip, teatrlandyrylǵan konsert qoıylyp, kóńil kóterý jáne saıystyq, balalar men sport súıer qaýymǵa arnalǵan basqa shaǵyn alańdar da kóńildi. Qalalyq ákimdik habarynsha, Ertis ózeni jaǵalaýyndaǵy ortalyq alańda 15 myńnan astam adam Naýryzdy merekeleýde. Túrli is-sharalarǵa 600-den astam ónerpaz qatysýda. Qala turǵyndary men óńir qonaqtary úshin 5000-nan asa baýyrsaq, 300 lıtr kóje men 600 keli palaý daıynaldy. Tegin beriletin tamaqtardan kez-kelgen adam dám tata alady. Alańda «Aq dastarhan» baýyrsaq saıysy ótti. Oblystyq bilim basqarmasynyń uıymdastyrýymen,mektepter ashyǵan, ashymaǵan baýyrsaqtar, tátti, maı qosylǵan, bal qosylǵan baýyrsaqtar, shı baýyrsaq, shelpek baýyrsaq, usaq, dóńgelek, qytyrlaq, sorpaǵa qosylǵan baýyrsaqtardyń ár túrin ázirlep qonaqtarǵa usynýda. Ortalyqtan bólek qalanyń 12 shaǵyn aýdany men 8 kásipornynda meıram toılanýda. Ortalyq alańda bul kúni teatrlandyrylǵan sahnalyq qoıylym kórsetilip, otandyq estrada juldyzdary óner kórsetýde. Ulttyq sport túrleri boıynsha jarystar ótkizilýde. Naýryz meıramynda Altynaı Jorabaeva, Jázıra men Janbolat kelip án shyrqady.
Farıda Byqaı,
«Egemen Qazaqstan»
Pavlodar
Sýretterdi túsirgen Valerıı Býgaev
