Sonyń ishinde shoqtyǵy bıik sanalýan is-sharalar óńirde ótken 22-naýryz kúni ótkizildi. Onyń qaı-qaısysyna da birinshi kezekte áleýmettik sıpat pen basymdyq berilgeni Aqtóbedegi naýryz toıynyń ajaryn asha tústi. Ulttyq naqyshtar men ejelgi salt-dástúrlerimizge saı órnektelip jasaqtalǵan kıiz úılerdiń árqaısysy oblysta bıylǵy jyly júzege asatyn áleýmettik jobalardyń ataýlaryn aldy. Aıtalyq bıyl oblysta «Analarǵa taǵzym» áleýmettik jobasy qolǵa alyndy.
Sondaı óńirde 2018 jyl –Balalar jyly dep belgilendi. Mine, máni men sáni kelisken kıiz úıler ataýlary osyndaı baǵytpen jalǵasa beredi. Toılaý men oılaý jáne túr men mazmun bir-birimen tyǵyz úılesim tabýy da Ulystyń Uly kúnine tán qundylyqtardy baıyta tústi. Sondaı-aq naýryz meıramy qurmetine oraı oblys aýmaǵynda jıyrma áleýmettik nysan paıdalanýǵa berilgeni de basty artyqshylyq pen ózgesheliktiń biri.
Negizgi shara QR Prezıdenti atyndaǵy saıabaq aýdanynda, ıaǵnı Ábilqaıyr han dańǵylynyń boıynda márege jetti. Munda «Naýryzym –qut –bereke!» atty merekelik dýman men teatrlandyrylǵan jáne gala-konsertter qoıylyp, óńir turǵyndaryn Aqtóbe oblysynyń ákimi Berdibek Saparbaev jańǵyrý merekesimen quttyqtap sóz sóıledi.
Osyjerde uzyndyǵy bir kılometrge jýyq pavılondar qatary ornalastyrylyp, aqtóbelikter oǵan tegin qoıylǵan 10 tonna baýyrsaq pen 13 myń lıtr naýryz kójeden dám aýyz tıdi. Osy oraıda qosyp, aıta keterlik másele Aqtóbe aımaǵynda ornyqqan taǵy bir quptaýǵa turarlyq úrdis bar. Naýryz kúni oblys ortalyǵyndaǵy meıramhana-kafeler men ashanalar júıesinde jáne barlyq qoǵamdyq tamaqtandyrý oryndarynda oǵan kelgen klıentterge baýyrsaq pen naýryz kóje tegin usynylady.
Joǵaryda atalyp ótkendeı Aqtóbe aımaǵyndaǵy naýryz rýhyn tý etken sharalar tek bir kúnniń aıasymen shektelmeıdi. Bulardyń deni birinshi kezekte áleýmettik jaǵynan az qamtylǵan azamattar men balalardy, sonymen birge kóp balaly analar men soǵys jáne eńbek ardagerlerin moraldyq jáne materıaldyq turǵydan qoldaýǵa baǵyttalyp otyr.
Temir Qusaıyn,
"Egemen Qazaqstan"
