Oblystyq Tótenshe jaǵdaılar departamentiniń taratqan sońǵy málimetterine súıensek, aımaqta 600 adam qaýipsiz jerge kóshirilipti. Ásirese О́skemenniń irgesindegi Glýbokoe aýdany turǵyndaryna qıyn tııýde. Aýdannyń toǵyz birdeı aýylyn (Glýbokoe, Predgornoe, Progress, Altaı, Beloýsovka, Vınnoe, Novo-Ýlbınka, Veselovka, Zarechnoe) sý basqan.
Oblys ákimi Danıal Ahmetov keshe túndeletip Glýbokoe aýdanyna baryp, tasqynnan zardap shekken úılerdiń turǵyndarymen kezdesip, jaǵdaıdy óz kózimen kórip qaıtty. Aıta keteıik, keshe atalǵan aýdanda jergilikti aýqymdaǵy tótenshe jaǵdaı jarııalanyp, 406 adam (135-i – balalar) qaýipsiz jerge kóshirilgen-di. Olardyń bir bóligi Glýbokoe kentindegi jataqhanaǵa, Beloýsovka kentiniń aýrýhanasyna, Agrarlyq kolledjge, Predgornoe aýylynyń №2 orta mektebine, Progress aýylynyń №6 orta mektebine, qalǵandary týystarynyń úılerine ornalastyrylǵan edi. «Glýbochanka ózeni arnasynan asyp, osyndaı jaǵdaı oryn alyp otyr. 2 kúnniń ishinde arnaıy komıssııa barlyq sý alǵan úılerdi tekseredi. Kirý múmkin emes bolǵan úılerdiń máselesi sý qaıtqan soń qaralady. Sol tekserýler nátıjesinde turýǵa jaramsyz bolǵan úı ıelerine basqa úı nemese páter beriledi. Búlingen úıler jóndeledi» - dedi aımaq basshysy turǵyndarmen kezdesýinde.
D.Ahmetovtyń aıtýynsha, sońǵy 3 táýlikte Glýbokoe aýdanynan bólek О́skemen qalasynda 60 úıdi, Katonqaraǵaı aýdanynda 4 úıdi sý alǵan. Qazirgi ýaqytta Glýbokoe aýdany boıynsha sý basqan úılerdiń sany 163-ke jetip, 566 adam qaýipsiz jerge kóshirilgen. Áleýmettik nysandar bazasynda qurylǵan ýaqytsha baspanalardy solardyń tek 60-y ǵana panalaýda. Qalǵandary týysqandarynyń úıine ornalasypty. «Eki kúnniń ishinde 78 mıllımetr jańbyr jaýǵan. Bul úsh aıdyń mólsherinen asady. Glýbokoe aýdanynda sý alǵan aýyldar da, О́skemenniń shetindegi jeke sektorlar da shuńqyrly jerde ornalasqan.
Mezgilsiz jaýyn jibip úlgermegen tońnyń betimen úılerge jaıylyp otyr. Buǵan deıin Aıagózdegi tasqynnan zardap shekken otbasylarǵa barlyǵy 189 mln teńge bólindi. Al О́skemendegi tasqynnyń saldaryn joıýǵa qala bıýdjetinen qarjy jumsalýda. Glýbokoe aýdanyndaǵy sý basqan úılerdiń teń jartysy tekserildi. Qalǵanyn 2 kúnniń ishinde qarap shyǵady. Sonyń nátıjesi boıynsha tıisti qarjy bólinedi» - dedi oblys ákimi.
Oblystyq Tótenshe jaǵdaılar departamenti búgin Zyrıan aýdanyndaǵy Berezovka ózeni arnasynan asyp, Solovevo aýylynan 18 adamnyń (onyń 10-y bala) qaýipsiz jerge kóshirilip, ýaqytsha aýyldaǵy mektepke ornalastyrylǵanyn habarlady. Qazir Katonqaraǵaı men Úlken Naryn aýyldaryndaǵy kolledjderde evakýasııalaý beketteri ashylyp, 32 turǵyn ýaqytsha ornalastyryldy.
Azamat QASYM,
«Egemen Qazaqstan»
Shyǵys Qazaqstan oblysy
