Foto: Lınar Galımov
B. Momyshuly kóshisi boıyndaǵy turǵyn úı kesheninde alǵashqy bolyp jańa páterlerdi kópbalaly, otbasynda múgedek balalar barlary, sondaı-aq tolyq emes otbasylar aldy. Olar «Turǵynúıqurylysjınaqbanki» AQ arqyly «Nurly jer» memlekettik baǵdarlamasyna qatysty.
- Bul jańa úılerdegi páterler tamasha, - dedi aımaq basshysy. – Munda jaqyn arada mektep, balabaqsha, emhana, dúkender men jaıly ómirge qajetti barlyq ınfraqurylym paıda bolady. Keleshekte bul aýdan Qaraǵandynyń ortalyǵyna aınalady. Ár otbasy úshin baspanaǵa ıe bolý úlken arman, jánede búgingi kúni ol armandar oryndalyp jatyr. Barlyqtaryńyzǵa Naýryz meıramy baqyt pen jaqsylyq syılasyn dep tileımin. Jańa qonys – ol tek sizderdiń ǵana qýanyshtaryńyz emes, oǵan biz de – qala, oblys basshylyǵy qatty qýanamyz, sebebi Elbasy aldymyzǵa úlken mindet qoıdy: aımaqtyń turǵyndarynyń áleýmettik ómir deńgeıin kóterý. Ol úshin biz jumys isteýimiz qajet. Eń basty jáne qıyn mindet – barlyq muqtaj azamattardy baspanamen qamtamasyz etý.
Jańagúl Aldanazarova, bastaýysh synyp muǵalimi jáne kópbalaly ana, baspana alýǵa kezekte 2010-shy jyldan beri turǵan. Búgin oblys ákiminiń qolynan armandaǵan kiltin alyp, ol «Nurly jer» baǵdarlamasyna qatysýǵa múmkindik alǵany úshin alǵysyn bildirip, Erlan Qoshanovty qonaqqa shaqyrdy. Qonystanǵan otbasynyń dastarhany ulttyq taǵamdardan jaınap turdy.
- Buryn biz kishkentaı páterde Maıqudyqta, 13-shi yqsham aýdanda turdyq. Qazirgi jańa páterimiz úlken, 70 sharshy metr. Munda barlyǵymyzǵa jaıly bolady, - dedi Jańagúl.
Kelesi oqý jyly qarsańynda jańa yqsham aýdanda 1200 orynǵa shaqtalǵan mektep ashylady. Úılerdiń tómengi qabattarynda emhana men mektepke deıingi búldirshinderge arnalǵan shaǵyn ortalyqtarǵa oryn qaldyrylǵan.
Kún jylyǵan bette aýlalar abattandyrylatyn bolady: asfalt tóselip, jaryq shamdary ornatylyp, balalar alańy qurylady.
Barlyǵy jańa turǵyn úı kesheninde 1125 páter bar. Jyl sońyna qaraı barlyq úıler salynyp bitip, qoldanysqa berilmek. Ǵımarattardyń jalpy aýdany – 83 503 sharshy metr, olaryń 59 532-i – páterlerdiń aýdany.
Qazir oblys ortalyǵynda baspanaǵa kezekte 15 714 adam tur. Olardyń arasynda jetimder, múgedekter, UOS ardagerlerine teńestirilgen azamattar, múgedek balalary bar ata-analar, sozylmaly dertterge shaldyqqan tulǵalar, kópbalaly jáne tolyq emes otbasylar, memlekettik qyzmetkerler jáne basqalary bar.
«Nurly jer» turǵyn úı qurylys baǵdarlamasy birneshe baǵyttardan quralady jáne qazaqstandyqtardyń turǵyn úı jaǵdaılarynyń sapasyn joǵarylatýǵa, ıpotekalyq nesıeleý sektordy yntalandyrýǵa arnalǵan. Baǵdarlamanyń maqsaty – azamattarǵa óz baspanasyn alýǵa kómektesý bolyp tabylady.
