– Búgin bizdiń halqymyzdyń Naýryz meıramymen qaýyshqanyna 30 jyl tolyp otyr. Keńes dáýirinde tyıym salynǵan ulttyq merekemiz Almatyda 1988 jyldyń kókteminde bir top ult zııalylarynyń bastamasymen, sol kezdegi Qazaq KSR Mınıstrler Keńesiniń tóraǵasy Nursultan Ábishuly Nazarbaevtyń qoldaýymen qaıta jańǵyrdy. Sol kezderi Memleket basshysy «Naýryz – ǵasyrlar qoınaýynan bastaý alǵan erekshe ulyq merekemiz, jaqsylyqtyń jarshysy, jaratylystyń shynaıy jyl basy» dep atap ótken bolatyn, - dedi Baýyrjan Baıbek.
Ásirese, «Astana» alańynda ótken konserttik baǵdarlama kópshiliktiń kóńilinen shyqty. Jeztańdaı ánshi Roza Rymbaeva, dańqty «Dos-Muqasan» toby jáne qazaq estradasynyń basqa da juldyzdary oryndaǵan ásem ánderdi halyq erekshe yqylaspen tyńdady. Sonymen qatar basqa da memleketterden kelgen ánshi men bıshiler almatylyqtardyń aldynda óner kórsetip, jınalǵan jurttyń ystyq yqylasyna bólendi.
Almatynyń basqa da kórikti jerlerinde kıiz úıler tigilip, dastarqandar molynan jaıyldy. Ulystyń uly kúnin toılaýǵa eńbektegen baladan eńkeıgen qartqa deıin keldi. Qala turǵyndary men qonaqtarǵa naýryzkóje jáne basqa da ulttyq taǵamdar taratyldy. Teatrlandyrylǵan kórinister qoıylyp, án men bı baıqaýlary, sporttyq sharalar jáne qolóner sheberleriniń jármeńkesi uıymdastyryldy.
Naýryz merekesi Almatyda bir aı boıy toılanady. Sol ýaqyt aralyǵynda Alataý bókterindegi ásem shaharda 150-den asa túrli sharalar ótedi dep kútilýde.
Ǵalym SÚLEIMEN,
«Egemen Qazaqstan»
Almaty
