«Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýynda Elbasy usynǵan 10 mindettiń jetinshisi «Adamı kapıtal – jańǵyrý negizi» dep atalyp, bilim berýdiń jańa sapasyna qalaı jetýdi naqtylap berdi. Elbasy: «Bilim berý baǵdarlamalarynyń negizgi basymdyǵy ózgeristerge únemi beıim bolý jáne jańa bilimdi meńgerý qabiletin damytý bolýǵa tıis», dep bilim berý salasyndaǵy dara damý, erekshe oqytý sapasy, bilim básekelestigin arttyrý jolyndaǵy ózgerister men jańartylǵan mazmuny týraly naqty qadamdardy anyq jetkizgen.
Elbasy mádenıetimiz ben ıdeologııamyzdy odan ári damytý da «Rýhanı jańǵyrýdyń» mańyzdy ekenin: «О́ziniń tarıhyn, tilin, mádenıetin biletin, sondaı-aq zamanyna laıyq, shet tilderin meńgergen, ozyq ári jahandyq kózqarasy bar qazaqstandyq bizdiń qoǵamymyzdyń ıdealyna aınalýǵa tıis», degen sózi arqyly bildirdi.
Elbasy muǵalim mártebesin kóterý maqsatynda qosymsha 67 mıllıard teńge bólý qajettigin aıtyp, bilim berýdiń jańartylǵan mazmunyna kóshken ustazdardyń laýazymdyq jalaqysyn 2018 jyldyń 1 qańtarynan bastap 30 paıyzǵa kóbeıtýdi tapsyrdy. Memleket basshysynyń dástúrli Joldaýlaryn júzege asyrýda bizdiń oqý ornymyz da ózindik úles qosyp keledi.
Oblysymyzǵa asa qajet maman kadrlar daıyndaıtyn agrotehnıkalyq kolledjde 1500 astam stýdentter bilim alýda. Oqytýdyń QT ST ISO 9001-2016 «Sapa menedjmenti júıeleri. Talaptar» júıesi oqý-tárbıe prosesine tolyqtaı engizildi. Kolledjder arasynda respýblıkada alǵashqylardyń biri bolyp ınstıtýttyq akkredıtasııa kýáligine ıe bolýymyz halyqaralyq dárejedegi kásibı bilikti mamandar daıyndaýǵa múmkindik berip otyr.
«Qazaqstan Respýblıkasyndaǵy bilim berýdi damytýdyń 2011-2020 jyldarǵa arnalǵan memlekettik baǵdarlamasynyń» basty maqsaty – bilim sapasyn kóterý. Osy oraıda, kolledj ákimshiligi oblysymyzdyń 70-ten astam óndiris mekemeleri jáne shetel kompanııalarymen tyǵyz baılanysta bolýynyń nátıjesinde oqý-óndiristik, tehnologııalyq, dıplomaldy tájirıbelerin bazalyq mekemede ótkizgen stýdent jastardyń óndiristik tájirıbe jınaqtaýyna jáne oqýyn bitirgesin mekemelerde mamandyǵyna sáıkes jumysqa ornalasýyna múmkindik jasap otyr. Bul jumys kásibı bilikti maman daıyndap qana qoımaı, sonymen birge bilim sapasyn kóterýge múmkindik beredi. Osyndaı baǵyttaǵy jumystardy halyqaralyq dárejede de iske asyrýdy bastadyq. Reseı Federasııasynyń Astrahan qalasynda ornalasqan Teńiz jáne ózen kóligi Kaspıı ınstıtýty bazasynda bizdiń «Keme júrgizýshi» mamandyǵynyń stýdentteri tájirıbeden ótip, halyqaralyq sertıfıkatqa ıe bolady. Bul osy mamandyq túlekteriniń tolyq mamandyǵyna saı Qashaǵan kenishi syndy basqa da óndiris oryndaryna jumysqa ornalasýyna múmkindik beredi. Sonymen birge kadrlar daıyndaýdyń dýaldy júıesin oqý-tárbıe prosesine engizý baǵytynda birshama ıgi shara atqarylýda. «Jumyspen qamtý-2020», «Dıplommen – aýylǵa!» memlekettik baǵdarlamalary josparly túrde júzege asyp keledi.
Bilim jáne ǵylym mınıstrliginiń tapsyrmasyna sáıkes, «2011-2020 jyldarǵa arnalǵan bilim berýdi damytýdyń memlekettik baǵdarlamasy» aıasynda oqý-tárbıe júıesinde elektrondy oqytý júıesiniń qanatqaqty jobasy iske qosyldy. Tehnıkalyq jaǵynan tolyqtaı qamtamasyz etildi. Kolledj bazasy memlekettik bıýdjet esebinen elektrondy podıým, 30 monoblok, 20 kompıýter, 17 noýtbýk, 3 ınteraktıvti proektormen tolyqtyryldy. Sonymen birge kolledj esebinen oqý kabınetterine arnalǵan 12 ınteraktıvti taqta alyndy. Kolledjimiz boıynsha barlyq monoblok pen noýtbýkter symsyz ınternet jelisine (WiFi) qosyldy.
Elektrondy oqytý júıesi platformasy oqý prosesin basqarýǵa, ıaǵnı kadrlarmen bilim alýshylar kontıngentimen jumys, oqý, is qaǵazdardy júrgizý sııaqty úderisterdi avtomattandyrýǵa múmkindik beredi. Arnaıy elektrondy portal jasaqtalyp, portalǵa kez kelgen adam kirip, málimetpen tanysa alady, sonymen birge kolledj stýdentteri men ata-analarynyń ózderine berilgen jeke logınderi arqyly oqý barysyn qadaǵalap otyrýyna múmkindik jasalǵan.
Álemdik deńgeıdegi saıası oqıǵalardy, zaman talabyna saı bolyp jatqan rýhanı-áleýmettik ózgeristerdi eskere otyryp, Otanyn súıetin, óz tili men ádet-ǵurpyn syılaıtyn, ártúrli ult ókilderiniń salt-dástúrin qurmetteıtin bilikti, mádenıetti jastardy tárbıeleý jumysy osyndaı oqý oryndary qabyrǵasynda júzege asyrylatyndyǵyn basa aıtqym keledi. Búginginiń talaby tek bilikti maman daıyndaý emes, adamgershiligi mol, adamı qasıetteri tanylǵan tulǵa tárbıeleý.
Islam JANUZAQOV,
tehnıka ǵylymdarynyń doktory, professor
ATYRAÝ
