Mekteptiń úzdik oqýshylarynan quralǵan qarsy alýshy top qaladan kelgen mártebeli qonaqtardy shejirege toly mektep ómirimen keńinen tanystyrdy. Qazaqstannyń Tuńǵysh Prezıdenti qolyna alǵash qalam alǵan bilim ordasy taýsylmas tarıhı shejirege toly. Mektep oqýshylarynyń bilim salasynda, sportta, ónerde – qoǵamdyq ómirde qol jetkizgen tabystary kórneki qural retinde qabyrǵaǵa ilingen. Sýyrtpaqtap syr tartqan san syrly fotoderekter men qyzyqty qujattar bul mektepte shyn máninde kil daryndy balalardyń bilimi alatynyn ańǵartyp-aq tur. Kelýshilerge kórneki túrde málimet bergen tarıhı qujattar sol jasóspirimderdiń tııanaqty eńbegimen jınaqtalǵan. Sot ókilderiniń bul sapardaǵy oqýshylarmen pikir almasýy mektep ómirinde erekshe jańalyq bolyp qaldy.
Elbasynyń «Egemen Qazaqstanda» jarııalanǵan «Bolashaqqa baǵdar: rýhanı jańǵyrý» maqalasyna oraı Almaty qalalyq sotynyń sýdıasy Márııam Qarabaeva bylaı dedi:
– Meni erekshe tańqaldyrǵany – qatardaǵy aýyl mektebi 200-300 jyldyq óńir tarıhy týraly derekterdi jınap, birneshe urpaqtyń ómirinen qyzyqty málimetterdi tapqandyǵy. Táýelsiz elimizdiń árbir mektebinde el tarıhyn tereńnen qozǵaıtyn osyndaı mýzeıler bolsa eken degen úmitti oıda qaldym. Munyń jas urpaqtyń bolmysy men tárbıesine tıgizer shapaǵaty mol ekeni aqıqat. Elbasynyń alys bolashaqty meńzegen «Bolashaqqa baǵdar: rýhanı jańǵyrý» baǵdarlamalyq maqalasyna ispen jaýap berýdiń naǵyz úlgisi degenimizdiń ózi osy emes pe?!
Memlekettik rámizder men «Máńgilik El», Qazaqstanda turatyn san ult ókileriniń shyny astynda turǵan áserli beıneleri, Astanada ótken halyqaralyq EKSPO-2017 týraly fotoderekter, Qarasaı batyr týraly tarıhı qujattar kelýshilerdi kórnekiligimen tańdandyrmaı qoımady. Tanystyrylymdy úzdik júrgizgen oqýshylar derekter syryn keıde óleń joldarymen jetkizdi. Kezdesýdi erekshe áserlendirgen de osynaý poezııalyq qas-qaǵym sátter desek artyq aıtpaımyz.
«Shapaǵat» atalatyn mektep mýzeıin qundy jádigerlermen toltyrýda ulaǵatty ustaz Rymkesh apa Baıqonysovanyń sińirgen eńbegi ólsheýsiz. 1998 jyldyń 28 mamyrynda esigin ashqan mýzeıdiń 24 taqyryptyq bóliminde 2500-den astam jádiger saqtalǵan. Mektep mýzeıiniń meńgerýshisi, ǵylymı qyzmetkeri ári qor jınaýshysy sanalatyn Rymkesh apaı:
– Mundaı orasan kóp qujattar men qundy dúnıelerdi bir adamnyń ǵana jınap alýy esh múmkin emes te ári oǵan tiri adamnyń ýaqyty da jetpeıdi. Maǵan ózimizdiń mekteptiń muǵalimderi men oqýshylary aıanbaı qolǵabys etti. Búgingi tańda bes muǵalim men 8 oqýshy tikeleı osy mýzeıdegi barsha jınalǵan jádigerler men qujattarǵa jaýap beredi, – dedi.
Mýzeıge kelýshiler Elbasynyń qolyna qalam ustatqan alǵashqy ustazy Tákýra Alǵadaıqyzynyń ómirderegimen, jap-jas jigit – Nursultan Nazarbaevtyń Ýkraınanyń Dneprodzerjınsk qalasyndaǵy oqýy, jas maman retinde qalyptasýy, odan soń memleket jáne qoǵam qaıratkerligine deıin ósý joldarymen qyzyǵýshylyqpen tanysty.
Úshqońyr aýylyndaǵy saıahattyń eki jaqqa da áseri bolǵanyn anyq. Mektep oqýshylary sot-bılik ókilderimen birge sýretke tústi. Qonaqtar atynan Almaty qalalyq sotynyń tóraǵasy Nurǵazy Ábdiqanov mýzeıdegi Qurmetti qonaqtar kitabyna shynaıy tilegin jazdy. Almatylyqtar Úshqońyr aýylynan qanattanyp qaıtty.
Qory kóp mektep mýzeıi taǵy bir jádigermen tolyqty.
Talǵat SÚIINBAI,
«Egemen Qazaqstan»
ALMATY
