Bitim bolmysy, qalam terbeýi bólek jazýshy qazaq ádebıetine «Adasqaq», «Besin», «Besatar» syndy shoqtyǵy bıik týyndylardy dúnıege ákeldi. Sozaq aýdanynyń ortalyǵy Sholaqqorǵandaǵy jalpy orta mektepke jerlesteriniń júrek qalaýymen Asqar Súleımenovtiń aty berilip, eńseli eskertkishi ornatylǵaly birshama jyldyń júzi boldy.
«Elbasy N.Nazarbaev «Bolashaqqa baǵdar: rýhanı jańǵyrý» maqalasynda «Ulttyq jańǵyrý degen uǵymnyń ózi ulttyq sananyń kemeldenýin bildiredi. Ulttyq salt-dástúrlerimiz, tilimiz ben mýzykamyz, ádebıetimiz, joralǵylarymyz bir sózben aıtqanda ulttyq rýhymyz boıymyzda máńgi qalýǵa tıis», dep atap kórsetken bolatyn. Osy maqsatta tól ónerimizdi tórge shyǵaryp, ádebıetimizdi ulyqtap, Asqar Súleımenov atyndaǵy «Sóz zergeri» atty kórkemsóz oqý sheberleriniń oblystyq baıqaýyn uıymdastyrdyq», deıdi aýdan ákimi Salyhan Polatov.
Baıqaýdyń shymyldyǵy aýdandyq halyq teatrynyń ónerpazdary qoıǵan «Asqar beınesi» sahnalyq kórinisimen túrildi. Sozaq aýdanynyń 90 jyldyǵy aıasynda uıymdastyrylǵan «Sóz zergeri» oblystyq baıqaýyna Ońtústik Qazaqstan oblysynyń aýdan, qalalarynan irikteýden ótken 14 úmitker qatysyp Asqar Súleımenovtiń kórkemdigi joǵary prozalyq shyǵarmasynan úzindi oqyp, túrli avtorlardyń nemese óz shyǵarmashylyǵynan «Ańyz – ǵumyr, Asqar – jyr» arnaý óleńderin oqydy. Qazylar alqasynyń sheshimimen Sozaq aýdanynan at qosqan úmitker Ashat Aıdúısenov bas júldeni qanjyǵasyna baılady. Oǵan 150 myń teńge aqshalaı júlde tabystaldy.
Teriskeılikter Asqar Súleımenovtiń mereıtoıymen qatar bıyl talantty qalamger Táken Álimqulov pen tókpe kúıdiń sheberi Tólegen Mombekovtiń 100 jyldyǵyn, Bátıma Batyrbekovanyń 90 jyldyǵyn da keń kólemde atap ótpek. Búginde arnaıy is-sharalar kestesi túzilip, aýdan kóleminde, mektepterde tanymdyq sabaqtar oqytylyp, talantty tulǵalardy elge jan-jaqty nasıhattaıtyn jıyndar, respýblıkalyq ǵylymı-teorııalyq konferensııa uıymdastyrý úshin ár-alýan aýqymdy tirlikter atqarý bastalyp ketti.
Ǵalymjan ELShIBAI,
«Egemen Qazaqstan»
Ońtústik Qazaqstan oblysy
