Alǵashqy eki aptanyń qorytyndysy aıtarlyqtaı nátıje berip otyr. Atalmysh kompanııanyń aksııasyn Almatydaǵy qoǵamdyq kólikte 60 myńnan astam adam paıdalanǵan. Jalpy alǵanda, esepti kezeńde SMS arqyly 370 myń tólem jasalǵan.
«Aksııanyń alǵashqy nátıjesi biz oılaǵannan asyp tústi. Klıentter men SMS tranzaksııalar sany ósip keledi. Jaqynda táýliktik rekord – 100 myń operasııa jasaldy. Tehnıkalyq turǵydan biz bul sandy eki ese arttyrýǵa daıynbyz», deıdi Beeline-Qazaqstannyń transformasııa jáne strategııa jónindegi bas dırektory Oleg Aldoshın.
«Almatydaǵy qoǵamdyq kólikte jolaqy 1 teńge» aksııasy 1 naýryzda bastalǵan bolatyn. Bul bastama ústimizdegi jyldyń 31 mamyryna deıin jalǵasady. Qyzmetti Beeline-nyń aldyn-ala tólem júıesine qosylǵan klıentter SMS-tólem arqyly paıdalana alady.
Jol aqysyn tóleý úshin avtobýstyń nemese trolleıbýstyń ishinde kórsetilgen kólik kodyn 2505 nómirine jiberý kerek. Telefon teńgeriminen 80 teńge ustalady da, onyń 79 teńgesi birden teńgerimge qaıtarylady. Osylaısha, jolaqy quny 1 teńgeni quraıdy. Bul qyzmetti qala turǵyndarynyń barlyǵy paıdalana alady.
SMS-tólem men Beeline aksııasy qaladaǵy barlyq baǵyttaǵy avtobýstar men trolleıbýstarda qoldanylýda.
Alaıda aksııa Almaty qalasyndaǵy jer ústinde júretin qoǵamdyq kólikte júrýge ǵana jaraıdy. SMS-tólem úshin teńgerimde eń kemi 80 teńge bolýy kerek. Aksııa boıynsha táýligine eń kóbi 3 ret júrýge bolady.
Oraıy kelip turǵanda, turǵyndarǵa jolaqyny tóleýdiń jańa mádenıetin kiriktirýge bel sheshe kirisken baılanys operatorynyń shtab-páteri Amsterdam (Nıderland) qalasynda ornalasqanyn aıta ketelik. «Veon» halyqaralyq telekommýnıkasııalyq holdınginiń bir bóligi bolyp tabylady. Qazir «Veon» – abonentter sany boıynsha álemde jetinshi oryndy ıelenedi. 2017 jylǵy úshinshi toqsannyń qorytyndysy boıynsha, kompanııa 235 mıllıonnan astam abonentke qyzmet kórsetedi.
Aınash ESALI,
«Egemen Qazaqstan»
ALMATY
