Qazir kez kelgen qazaqstandyq sýrettegi eki sportshymen maqtana alady. Sebebi beınedegi eki qazaqtyń biri (Baqyt Sársekbaev) – Olımpıada chempıony atansa, ekinshi qazaq (Qanat Islam) Qytaı quramasy sapynda synǵa túsip, qola júlde aldy. Sóıtip eki birdeı oǵlanymyz Olımpıadada medal alyp, tuǵyrdyń eń bıik satysynda ótkenge ónege, jastarǵa úlgi bolatyndaı tarıhı sýretke túsken edi.
Bir qyzyǵy Olımp shyńyn baǵyndyrǵan Baqyt Sársekbaev pen Qanat Islam ózge elde týyp, tarıhı otanyna oralǵan sportshylar. Baqyt Sársekbaev 1981 jyly О́zbekstannyń Tashkent oblysy, Tabaqsaı aýylynda týǵan. 2004 jyly Afınada ótken jazǵy Olımpııa oıyndarynda О́zbekstan quramasymen bara almaı, sol jyly Qazaqstanǵa oralǵan.
Al qytaıdyń 10 dúrkin chempıony bolǵan Qanat Islam Qytaıdyń Ile Qazaq avtonomııalyq oblysy, Altaı aımaǵynda týǵan. Beıjiń Olımpıadasynan keıin 2010 jyly azamattyǵyn aýystyryp, atamekeni Qazaqstanǵa qonys aýdardy. Ol Qazaqstanǵa London Olımpıadasyna tarıhı otanynyń atynan qatysýdy maqsat tutyp kelgen bolatyn. Biraq Qytaı tarapy Qanat Islamǵa qarsylyq tanytyp, Qazaqstan atynan saıysqa túsýge ruqsat bermedi. Sóıtip ol 2012 jyldan búginge deıin kásipqoı boksta baq synap keledi.
Tarıhı sýretti taspaǵa túsirgen qazaqstandyq fototilshi Stanıslav Fılıppov sol ýaqytta Olımp tuǵyrynda turǵan eki qazaqty sýretke túsirip turǵanyn bilmegenin aıtady. «Qatelespesem, Olımpııa oıyndarynyń sońǵy kúnderi bolatyn. Basshylar búgin Baqyt Sársekbaev fınalda judyryqtasady. Buıyrsa, qurama qorjynyna altyn júlde túsip qalýy múmkin, sen sol sátti sýretke túsirýiń kerek dedi. Kútkenimizdeı Baqyt fınaldyq aıqasta jeńimpaz atanyp, el mereıin ústem etti. Arenaǵa jınalǵan qazaqstandyqtardyń qýanyshyn sózben aıtyp jetkizý múmkin emes. Ol óz aldyna bólek estelik. Sóıtip kezek jeńimpaz ben júldegerlerdi marapattaý sátine keldi. Bar oıym – jaqsy kadr jınaý bolatyn. Resmı marapattaý sáti aıaqtalǵan soń Baqyt janyna Qanatty shaqyryp, sýretke túsýge yńǵaılandy. Qazaqstandyq sportshynyń árbir qımylyn nazardan tys qaldyrmaý úshin onyń árbir áreketin sýretke túsirýmen boldym. Qapelimde esh oı joq, Baqyt jaqyn dosymen sýretke túskisi kelgen eken ǵoı dedim de ekeýin sýretke túsirip aldym. Jarys aıaqtalyp, sýretterdi óńdep jatqanda aqparattyq saıttardan «Qytaıdaǵy qazaq boksshysy Olımpıadanyń qola júldesin aldy» degen syńaıdaǵy aqparatty kózim shalyp qaldy. Sonda ǵana Baqytpen birge sýretke túsken Qanat Islamnyń qazaq ekenin bildim. О́zimniń tarıhı sýret túsirgenimdi de sol kezde ańǵardym desem bolady. Degenmen, fototilshilerdiń kez kelgen kadry qundy ǵoı», deıdi Stanıslav Fılıppov.
Qazirgi tańda Baqyt pen Qanat elimizdiń maqtanyshtary. Qos qazaq oǵlanynyń Olımp tórindegi jeńisi men jetistigi sońdarynan ergen boksshylarǵa úlgi. Baqyt pen Qanattyń bul jetistigin kórip, estip ósken sańlaqtar dúbirli dodalarda Qazaqstannyń namysyn qoldan bermeıtini anyq.
Álı BITО́RE,
«Egemen Qazaqstan»
