Merekelik kesh Jastar teatrynyń ǵımaratynda elorda akterleri men rejısserleriniń qyzyl kilemnen ótý saltanatymen bastalyp, sahnalyq qýyrshaqtardyń teatrlandyrylǵan qyzyqty qoıylymyna ulasty. Bir aıta keterligi, astanalyq teatr ujymdarynyń kásibı meıramdaryn toılaý dástúri erekshe. Merekelik is-sharaǵa jaýapty teatrlar arnaıy tańdap alynyp, ár jyl saıyn sol óner oshaǵy kezegimen estafeta boıynsha saltanatty keshti uıymdastyrý múmkindigine ıe bolady. Bıyl Astananyń 20 jyldyǵy aıasyndaǵy teatr kúnin uıymdastyrý kezegi M.Gorkıı atyndaǵy Memlekettik akademııalyq orys drama teatryna berildi. Ujym dástúrli sharanyń formaty men mazmunyna birqatar jańashyldyq engizipti. Onyń negizgisi – ártisterdiń qyzyl kilemnen ótý sharasy men úzdikterge qurmet kórsetý Red Carpet Oskar júldesi formatynda ótýinde boldy. Tiri stendter men áýender, aty ańyzǵa aınalǵan Elvıs Preslı, zamanǵa saı Bullet Time fotosýret túsirý qondyrǵysy kelgen meımandardyń kóńilin kóterip, merekelik keshtiń shyraıyn kirgizdi.
Bul – saltanatty sharanyń birinshi bólimi. Al ekinshi bólim sahnada ótkizildi. Munda merekelik baǵdarlamany M.Gorkıı atyndaǵy akademııalyq orys drama teatry, Q.Qýanyshbaev atyndaǵy Qazaq mýzykalyq drama teatry, Jastar teatry, «Naz» bı teatry jáne Astana qalasy Qýyrshaq teatry ujymdary daıyndaǵan teatrlandyrylǵan kórinister qonaqtar nazaryna usynylyp, Astananyń 20 jyldyq mereıtoıy aıasynda I «Altyn shymyldyq» teatr júldesi úzdikterge tabys etildi.
Qalalyq mádenıet jáne sport basqarmasynyń qoldaýymen ótken merekelik jıynnyń shymyldyǵyn Astana qalasy ákiminiń orynbasary Ermek Amanshaev ashyp, sahna maıtalmandaryn tól merekesimen quttyqtady. Saltanatty kesh odan ári «Altyn shymyldyq» ıegerlerin marapattaý rásimine ulasty. Táýelsiz teatr sarapshylarynyń sheshimi boıynsha «Jyl energııasy» nomınasııasy boıynsha Astana qalasy Jastar teatrynyń «Jasaýyl» áfsanasy (avtory – Janysh Qulmambetov, rejısseri – Bekbolat Qurmanǵojaev) I «Altyn shymyldyq» teatr júldesimen marapattaldy.
«Jyl qımyly» atalymyndaǵy syılyq Astana qalasy Qýyrshaq teatryna Roza Muqanovanyń «Máńgilik bala beıne» qoıylymy úshin (rejısseri – Quralaı Eshmuratova) tabys etildi. «Jyl kózqarasy» nomınasııasynda Q.Qýanyshbaev atyndaǵy Qazaq mýzykalyq drama teatry ujymy Serik Turǵynbekulynyń «Shámshi» elegııasy úshin (rejısseri – Bolat Uzaqov) úzdik dep tanyldy. «Jyl áreketi» júldesi «Naz» bı teatryna berilse, M.Gorkıı atyndaǵy akademııalyq orys drama teatry A.Pýshkınniń «Evgenıı Onegın» qoıylymy úshin (rejısseri – Iýrıı Kvıatkovskıı) «Altyn shymyldyq» syılyǵynyń ıegeri atandy.
Sahna maıtalmandarynyń kásibı merekesi osylaısha óz máresine jetti. Al «Altyn shymyldyq » I teatr júldesi osy jyldan bastap kásibı mereke saıyn Astana teatrlary úshin úzdik qoıylymdaryna dástúrli túrde jyl saıyn taǵaıyndalyp, maýsym jańalyǵyna aınalǵan qoıylymdar baǵaly syılyqtarmen marapattalatyn bolady.
Nazerke JUMABAI,
«Egemen Qazaqstan»
