Bul oıynǵa Stanımır Stoılov qurama oıynshylaryn ózgertilgen qurammen shyǵardy. Alǵashqy matchta qaqpa kúzetken Nenad Erıchtiń ornyna «Qaırattyń» qaqpashysy Vladımır Plotnıkov turdy. Kúzde bolatyn resmı oıyndarǵa deıin barlyq fýtbolshyny synaqtan ótkizemin degen bapker, komandanyń negizgi oıynshysy Dmıtrıı Shomkonyń ornyna Ǵafurjan Súıimbaevty saldy. Al qalǵan fýtbolshylar sol kúıi ózderiniń úırenshikti oryndaryna jaıǵasty.
Oıyn tájirıbıesiniń azdyǵy bolar, sol qaptaldaǵy qorǵanysqa jaýapty bolǵan Súıimbaev oıynnyń 24-mınýtynda aıyp alańynda tártip buzyp, qaqpamyzǵa aıyp doby belgilendi. Penaltıdi oryndaǵan Ivelın Popov múlt ketpedi. Eýropa alańdarynda dop teýip júrgen bolgarııalyqtar myqty legıonerleriniń arqasynda basymdylyqty jibere qoımady. Tek ekinshi taım bastalar tusta Bolgarııa bapkeri Petar Hýbchev máskeýlik SSKA sapynda oınaıtyn Georgıı Mılanov pen sofııalyq SSKA-nyń lıderi Stanıslav Monolevti almastyrdy. Al Stoılov alańǵa Erkebulan Tuńǵyshbaev pen Magomed Paragýlkovty shyǵardy. Oń qaptalda vınger qyzmetin oryndaǵan Tuńǵyshbaev 56-mınýtta qorǵaýshylar qateligin paıdalanyp, tarazy basyn teńestirdi.
Osy jerde aıta ketýimiz kerek, bapkerimiz negizgi shabýylshy qyzmetin atqarǵan Sergeı Hıjnıchenkonyń ornyn Roman Murtazaevqa bergen-tin. Murtazaev qaptaldan ortalyq shabýylshy róline aýysýymen shıraq qımylǵa kóshti. Tablodaǵy eseptiń teńesýine de «Astana» oıynshysynyń septigi mol boldy. Solǵyn qımyldaǵan Sergeı Hıjnıchenkonyń orny endi osydan keıin Murtazaevqa buıyryp ta qalar.
Al odan keıin ortada oıqastaǵan Baýyrjan Islamhan quramanyń kapıtany retinde jigitterdi shabýylǵa bastap otyrdy. Ádemi pastarynyń birshamasy Bolgarııa qaqpasynyń aldynda qaýipti sátter týyndatty. Tipti, Roman Murtazaev qaqpanyń mańdaıshasyn da aýyr soqqymen bir tekserip aldy. Ekinshi taımnyń birshama bólginde Hýbchev shákirtteri tek qorǵanýmen boldy.
Al qurama sapyna jańadan alynǵan Seıdahmet, Paragýlgov, Persýh sekildi jas talanttar senimdi qımyldarǵa kóshti. О́sip kele jatqan jastardyń óneri barsha qazaqstandyq jankúıerdiń kóńilinen shyqty. Tehnıkasy da, jyldamdyǵy da qarsylastan kem túspeıtin jigerli jastardy kórgenimizde el fýtbolynyń bolashaǵy bar ekenine sengendeı boldyq.
Oıynnyń ekinshi taımyn túgelimen óz baqylaýymyzda ustap, basymdylyqqa ıe bolǵanymyzben sońǵy mınýtta bir qatelik jiberip aldyq. Erkebulan Tuńǵyshbaev aıyp alańynyń mańynda Spas Delevti shalyp qulatty. Standarttyq jaǵdaı Nıkolaı Bodýrovtyń baspen gol soǵýyna ákep soqtyrdy. Eń sońǵy sekýndtarda soǵylǵan gol Qazaqstan quramasynyń áli sońǵy mınýt sındromynan aıyqpaǵanyn kórsetedi.
Endi, kúzde bolatyn Grýzııaǵa qarsy oıynǵa tyńǵylyqty daıyndyq jumystary júredi. Resmı matchtarda mundaı qatelikter oryn almas dep úmittenemiz.
Stanımır Stoılov, Qazaqstan quramasynyń bas bapkeri:
– Vengrııa men Bolgarııaǵa qarsy ótken oıyndar bizdiń jigitterdiń deńgeıin kórsetti. Biz munymen toqtap qalmaımyz. Kúzge deıin jastarymyzdyń oıynyn da, taktıkalyq saýattylyǵyn da arttyra beremiz. Vengrııany uttyq dep dandaısymaımyz. Sońǵy sekýndta kez kelgen qarsylas gol soǵyp ketýi múmkin.
Petar Hýbchev, Bolgarııa quramasynyń bas bapkeri:
– Qazaqstan quramasy bizdi tańǵaldyrdy. Buryn Almatyda ótken joldastyq oıynda 2:1 esebimen ońaı jeńgen edik. Al búgingi jeńisimiz tipti bir kezdeısoq sáttilik sekildi. Demek bizge áli kóp eńbek etip, oıynymyzdy túzeý kerek degen sóz. Qazaqstan quramasyna sáttilik tileımin.
Ermuhamed MÁÝLEN,
«Egemen Qazaqstan»
