Esterińizge sala keteıik, 5 mamyrda AQSh-tyń Las-Vegas qalasynda ótedi dep josparlanǵan jekpe-jekke eki aı qalǵanda Saýl Alvarestiń ruqsat etilmegen dári dármekterdi paıdalanǵany belgili bolyp, basy úlken daýǵa qaldy. Osy jaǵdaıǵa baılanysty bul kúnderi boks salasynyń basy-qasynda júrgen mamandardan bastap, qatardaǵy qarapaıym jankúıerlerge deıin óz oılaryn ortaǵa salyp, san alýan pikirler aıtýda. Máseleniń ýshyǵýyna baılanysty GGG men Kanelo arasyndaǵy kezdesýdiń keıinge shegerilýi de ábden múmkin. Al solaı bolǵan jaǵdaıda GGG-ge kim qarsylas atanýy múmkin?
Qazirdiń ózinde birneshe boksshy «Gennadıı Golovkınmen judyryqtasýǵa daıynmyn» dep jahanǵa jar salýda. Solardyń arasynda amerıkalyq Djermall Charlo men ýkraınalyq Sergeı Derevıanchenko erekshe belsendilik tanytýda. Bul ekeýi de kópshilikke jaqsy tanymal. 27 jastaǵy AQSh boksshysy 10 jyldan beri kásipqoı rıngte kúsh synasýda. Osy aralyqta 26 kezdesý ótkizip, barlyǵynda basymdyq tanytty. 20 qarsylasyn esinen tandyrdy.
32 jastaǵy Ýkraınanyń sańlaǵy kezinde Dúnıejúzilik boks serııasy dodasynda «Astana arlandary» sapynda keremet óner kórsetkenin jankúıerler umyta qoıǵan joq. Derevıanchenko sol jobadaǵy eń myqty boksshylardyń biri retinde kópshiliktiń esinde qaldy. 2014 jyly kásipqoı rıngte baq synaýǵa bel býǵan ol 12 básekeniń barlyǵyn jeńispen aıaqtady. 10 qarsylasyn nokaýtqa jiberdi.
GGG-men judyryqtasýǵa qulshynys tanytyp otyrǵandar arasynan Matveı Korobovty da erekshe atap ótýge bolady. 35 jastaǵy Reseıdiń sańlaǵy kezinde áýesqoılar arasynda álemniń eki dúrkin chempıony jáne Eýropa birinshiliginiń jeńimpazy atandy. 2003 jylǵy Bangkokta ótken dúnıejúzilik dodada Korobov bizdiń Gennadıı Golovkınge jáne 2004 jylǵy Beıjiń Olımpıadasynda Baqtııar Artaevqa ese jiberdi. Kásipqoı rıngte judyryqtasyp júrgenine 10 jylǵa jýyqtady.
Sol aralyqta 28 kezdesý ótkizip, 27 ret jeńiske jetti. 14 qarsylasyn aıqyn basymdyqpen utty.
Sondaı-aq jerlesimizben judyryqtasýǵa erekshe ynta tanytyp otyrǵandar qatarynda AQSh-tyń apaıtósi Demetrıýs Andrade, Meksıkanyń myqtylary Hýlıo Sezar Chaves, Roberto Garsııa jáne Japonııanyń juldyzy Rıota Mýrata syndy kásipqoı boks áleminde esimderi erekshe qurmetpen atalatyn saıypqyrandar bar.
Ǵalym SÚLEIMEN,
«Egemen Qazaqstan»
