«Búgin men Konstıtýsııany qaıta qaraý týraly jobany usynamyn. Men halyqqa memlekettiń negizgi zańyn ózgertemin dep sóz bergen edim. Osy ýádemdi oryndaıtyn kez jetti», dedi Mýn Chje In.
Ol Birikken Arab Ámirlikterinde resmı saparda júrgendikten qujattyń elektrondy nusqasyna qol qoıǵan. Zań jobasyn Ulttyq jıyn qoldasa, odan keıin referendým ótkiziletin bolady. Ázirge referendým 13 maýsym kúni ótedi dep josparlanyp otyr.
Eger Konstıtýsııanyń jańa nusqasy qabyldansa, prezıdenttiń ókilettilik ýaqyty 5 jyldan 4 jylǵa deıin qysqarady. Biraq qazirgi prezıdent óz kandıdatýrasyn kelesi saılaýda usyna alatyn quqyqqa ıe bolmaq. Sońǵy ret Koreıa Respýblıkasynyń konstıtýsııasyna 1987 jyly ózgeris engizilgen bolatyn.
Katalonııada Pýchdemonnyń qamaýǵa alynýyna qarsy sherý ótti
Germanııada katalonııalyq separatısterdiń kóshbasshysy Karles Pýchdemonnyń qamaýǵa alynǵanyna narazy halyq sherýge shyqty. Sońǵy derekter boıynsha Barselonadaǵy úsh kúnge sozylǵan narazylyq aksııasyna 55 myń adam qatysqan. Sondaı-aq Pýchdemon mer bolǵan Jıron qalasynda, Tarragon men Leıd qalalarynda da narazylyq sherýi ótken.
Sherý barysynda polısııamen qaqtyǵystan 90 adam zardap shekti. Polısııa 4 adamdy qamaýǵa aldy. Aldaǵy dúısenbi kúni Pýchdemon Germanııada sot aldynda jaýap beretin bolady. Ol Fınlıandııadan Belgııaǵa bara jatqanda ustalǵan edi. Al ótken juma kúni Ispanııa soty Pýchdemonnyń qamaýǵa alynýyna eýropalyq order berdi. Bılikke qarsy shyǵyp, búlik shyǵarǵany úshin ol 30 jylǵa deıin bas bostandyǵynan aıyrylýy múmkin.
AQSh-Qytaı saýda soǵysy qarjy naryǵynyń quldyraýyna yqpal etti
О́tken aptada AQSh Prezıdenti Donald Tramp jalpy quny 60 mlrd dollardan asatyn Qytaıdan keletin taýarlar ımportyna salyq engizetinin aıtqan bolatyn. Sondaı-aq Amerıka bıligi Qytaı kompanııalaryn tehnologııalar urlaýmen aınalysady dep aıyptaýda. Buǵan jaýap retinde Qytaıdyń saýda mınıstrligi Amerıkadan jetkiziletin 128 taýar ımportyna salyqty 25 paıyzǵa arttyrýdy josparlap otyrǵanyn habarlady.
Qarjy sarapshylarynyń aıtýynsha, ekonomıkasy eń iri ári ózara saýda aınalymy júzdegen mıllıard dollardan asatyn eki memleket arasyndaǵy saýda soǵysy búkil álem boıynsha qarjy naryǵynyń quldyraýyna áser etken. Sonymen qatar mamandar ınvestorlardyń AQSh pen Qytaı valıýtasyna qyzyǵýshylyǵy da kúrt tómendegenin aıtty.
Qarsylyq aksııasy
AQSh-tyń 800 qalasynda, onyń ishinde Vashıngton, Nıý-Iork, Boston, Chıkago jáne Hıýston sekildi iri qalalarda «О́mirimiz úshin sherý» aksııasyna jınalǵan halyq atys qarýyn satý jáne alyp júrýge baqylaýdy kúsheıtýdi talap etti. Narazylyq aksııasynyń uıymdastyrylýyna bıyl aqpanda Parklendtegi mekteptiń burynǵy túleginiń oqýshylarǵa oq atyp, 17 adamnyń mert bolǵany túrtki boldy. «О́mirimiz úshin sherý» uranymen ótken narazylyq aksııasyna shyqqandardyń deni – mektep oqýshylary men jastar.
Washington Post gazetiniń habarlaýynsha, 1999 jyldyń sáýir aıynan beri AQSh-ta 190 myńnan astam oqýshy sabaq kezinde atys-shabysqa tap bolǵan.
Sherýdi uıymdastyrýshylar qarý ustaýǵa baqylaýdy kúsheıtý problemasyna nazar aýdartýdy maqsat etti. Budan bólek olar jastarǵa qarashada ótetin kongress saılaýyna tirkelip, qarý aınalymyna qatysty erejeniń ózgerýine atsalysýǵa shaqyrdy.
Sholýdy ázirlegen
Gúlnur Qýanyshbekqyzy,
«Egemen Qazaqstan»
