«Prezıdentimiz Nursultan Ábishuly Nazarbaev «Qazaqstannyń áleýmettik jańǵyrtylýy» baǵdarlamasynda: «Meniń nazarymdaǵy basty másele – ár qazaqstandyqqa qamqorlyq kórsetý» degen bolatyn. Olaı bolsa, búgin «Dara» qaıyrymdylyq qorynyń quryltaıshysy, qazaqtyń qarapaıym qyzy Gúlnar Dosaevanyń qoldaýymen múmkindigi shekteýli balalarǵa arnalǵan psıhologııalyq-pedagogıkalyq túzetý mekemesiniń ashylýyna ózderińiz kýá bolyp otyrsyzdar. Atalǵan mekeme búginniń ózinde Aqtaý qalasyndaǵy 270-ke jýyq múmkindigi shekteýli balanyń 35-in qabyldap, óz jumysyn bastap ketti», dedi Mańǵystaý oblysynyń ákimi Eraly Toǵjanov.
«Aqtaý qalalyq psıhologııalyq-pedagogıkalyq túzeý kabınetiniń maqsaty – sóıleý, kórý, estý qabiletinde, oqyp-úırený, qarym-qatynas jasaý men damýynda qandaı da bir qıyndyqtary bar balalar men jasóspirimderge psıhologııalyq-pedagogıkalyq jáne medısınalyq kómek kórsetý. Jeke damý baǵdarlamasyna sáıkes defektolog, logoped, tıflopedagog, stardopedagog, olıgofrenopedagog, psıholog, áleýmettik pedagogpen jeke jáne toptyq jumystar júrgiziledi», dedi «Dara» qorynyń ókili Gúlnar Dosaeva.
Málimetterge súıensek, qazirgi tańda Mańǵystaý oblysy boıynsha 4968 múmkindigi shekteýli tárbıelenýshiler tirkelgen. Arnaıy bilim berý uıymdarynda 49 arnaıy pedagog, 23 logoped, 19 olıgofrenopedagog, 7 sýrdopedagog jumys jasaıdy. «Dara» qaıyrymdylyq qory múmkindigi shekteýli balalarǵa arnalǵan mektep-ınternatyndaǵy kózi kórmeıtin balalarǵa arnalǵan Braıl júıesi boıynsha jazý mashınkasyn tabystady.
«Dara» qaıyrymdylyq qorynyń quryltaıshysy Gúlnar Dosaeva men Mańǵystaý oblysynyń ákimi Eraly Toǵjanov Quryq psıhologııalyq-pedagogıkalyq kabınetiniń jumysymen tanysyp, múmkindigi shekteýli balalarǵa arnalǵan oıyn alańynyń ashylýyna qatysty. О́ńirde 2018 jyldyń sońyna deıin múmkindigi shekteýli balalarǵa arnalǵan Munaıly aýdanynan Pedagogıkalyq-psıhologııalyq jáne medısınalyq keńes (PMPK), Túpqaraǵan aýdany, Aqshuqyr aýylynan Psıhologııalyq-pedagogıkalyq túzetý kabınetin ashý baǵytynda jumystar júrgizýde.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy
