Bıyl festıvalge Fransııa, Anglııa, Shveısarııa, Reseıdiń eń úzdik ártisteri arnaıy keldi. Etýalder, prımalar, jetekshi solıster, sonymen birge álemge áıgili Jeneva men Borda teatrlarynyń jetekshileri de festıvalge oraı Almaty tórinen tabyldy. Ádemi bı men ásem áýen saltanat quratyn aıtýly shara bastapqyda álemdik bı mektepteri arasyndaǵy tájirıbe almasý alańy retinde oılastyrylǵan bolatyn. Byltyr ótken alǵashqy festıval almatylyqtardy klassıkalyq qoıylymdarymen qýantqany kórermen kóńilinen óshe qoımaǵan bolar. Al bıylǵy sharanyń bási de bıik, aýqymy da keń. О́nersúıer qaýym úshin zamanaýı horeografııa, contemprorary-balettiń eń úzdik úlgilerin teatr sahnasynan tamashalaýǵa múmkindik týyp otyr. Aýqymy keń óner dýmanyn ArtClassic kompanııasy Almaty qalasyndaǵy Fransııa Bas Konsýldyǵymen jáne Almaty qalasy ákimdigimen birlese Qazaqstan Respýblıkasy Tuńǵysh Prezıdenti – Elbasy qorynyń qoldaýymen uıymdastyrǵan. Sondaı-aq óner jármeńkesi on toǵyzynshy ǵasyrdaǵy tutas balet óneri onyń atymen atalǵan áıgili Marıýs Petıptiń týǵanyna 200-jyl tolýyna arnalyp otyr.
«200 jyl buryn naýryz aıynda aty ańyzǵa aınalǵan qoıýshy-horeograf Marıýs Petıp dúnıege keldi. Ol orys baletiniń negizin qalaǵan. Marıýs Petıp P. Chaıkovskıımen birge úzdik balet spektaklderin qoıdy. Bul týyndylar osy kúnge deıin ǵalamsharymyzdyń basty teatrlarynda kórsetilip júr jáne álemdik mura qazynasyna endi. Álemdik mádenı qaýymdastyq uly shyǵarmashylyq ıesiniń 200-jyldyǵyna arnalǵan túrli is-sharalar ótkizip jatyr. Al, Qazaqstan Petıpke kúlli balet festıvalin arnaıdy» deıdi Qazaqstan Respýblıkasy Tuńǵysh Prezıdenti – Elbasy Qorynyń Almatydaǵy ókildiginiń dırektory Sergeı Tohtarov.
Festıval baǵdarlamasynda – Marıýs Petıpanyń máńgi óshpes týyndylary: Parıj operasynyń etýaldary Mırıam Old-Bram men Matıas Eımannyń qatysýymen P. Chaıkovskııdiń «Uıqydaǵy arý»; Reseı Úlken teatrynyń ártisteri – prımabalerına Ekaterına Krysanova men jetekshi solıst Igor Svırko, Kovent-Garden Koroldik teatrynan shaqyrylǵan prıma-balerına Iаna Salenkonyń qatysýymen L. Mınkýstyń «Baıaderka» baletteri bar.
Dástúr boıynsha festıval aıasynda LEVITATION zamanaýı óner kórmesi kórermenge usynyldy. Sebebi, ónerdiń qaı túri bolmasyn bir-birimen úndes jáne olardyń árqaısysy óz tilinde tirshiliktiń máńgilik suraqtary, jaqsylyq pen zulymdyq, mahabbat pen óshpendilik, álem men adam jan dúnıesiniń sulýlyǵy jaıly syr shertedi.
Ballet Globe festıvali kúnderi Almatyda mýzyka, bı, kerbezdik pen ásemdik merekesiniń aıryqsha atmosferasy sharyqtaıdy. Árbir qoıylym, konsert nemese kórme asqaq ónerge degen ińkárligin jasyrmaıtyn talǵampaz kórermenniń qyzyǵýshylyǵyn týdyryp, shattyqqa bóleı túspek.
Arman OKTIаBR,
«Egemen Qazaqstan»
ALMATY
